KHAWTHLIR

Laptop hlan

Aizawl North-II bialtu MLA Dr Vanlalthlana chuan June 24, Inrinni zing khan a bial chhunga kumin HSLC leh HSSLC exam-a top 10-a tling mi pali hnenah laptop a hlân. Laptop hlanna hun hi Dr Vanlalthlana, MLA inah hman a ni a, bialtu corporator C Lalchhandami pawhin a hmanpui a ni.

President's rule puan thuai phût

BJP Scheduled Tribe Morcha, Mizoram chuan thuchhuah siamin, Manipur-a tlang mite'n harsatna nasa tak an tuar chu pawi an tih thu leh an lainat thu an tarlang a, "Heng thil thlen nachhanah hian Manipur sorkar, N Biren Singh kaihhruai chu mawhphurtuah kan ngai a, Central sorkar hian Manipur sorkar hi ṭhiat a, president's rule-a puan thuai kan phût a ni," an ti.

Minister-in tlawh

Law & Judicial minister TJ Lalnuntluanga chuan June 23, 2023 khan Khawzawlah District Court-a residential area leh District Jail sakna hmun tura ruahmante a enfiah a, 2nd IR headquarters a tlawh bawk. Minister chuan, sorkarin police pawimawhna hriain a thuam chak zel tih sawiin, "Khawvel pum min tibuaitu hripui vangin duh angin hma a lak chak thei lo a, a ṭul anga thuam chak zel turin ruahman mek a ni," a ti.

Convention centre

Deputy chief minister Tawnluia chuan June 24, Inrinni khan New Capital Complex-ah Aizawl Convention Centre sak mek a tlawh a, UDPA secretary Lalmalsawma Pachuau leh hotu dangte'n an ṭawiawm. Aizawl Convention Centre hi SPA scheme hnuaiah phase-I sak mek niin, cheng nuai 2,499.99 ruahman a ni a; phase-II pawh thawh ṭan thuai tum niin, Rs 7,48,86,967 ruahman a ni. May 2025-a sak zawh tura ruahman a ni.

Lehkhabu tlangzarh

V Vanlalruati ziah, 'Mahni nunna lak chungchang hi le' tih lehkhabu chu June 21, 2023 khan Synod Conference Centre-ah Synod moderator Rev. Dr C Chawnghmingliana'n a tlangzarh. Lehkhabu hi Synod Bookroom, Baptist Bookroom, OM Books leh Lianchhungi Book Store-ahte lei theih a ni.