Ruihhlo dona ni hman a ni; ruihhlo dona kawngzawh huaihawt

Nimin June 26 kha ruihhlo dona ni, International Day Against Drug Abuse and Illicit Trafficking vawi 34-na a ni a, Mizoram hmun hrang hrangah hman a ni. Aizawlah chuan Vanapa Hall-ah deputy chief minister Tawnluia hoin hman a nih bakah, ruihhlo dona kawngzawh huaihawt a ni a; cheng nuai 534 hû ruihhlo hâl a ni bawk.

Deputy Chief Minister chuan, ruihhlo laka invên hmasak chu tihmâkmawh a nih thu sawiin, "La khawih ve ngai lote'n an khawih lohna turin chhungkaw tinah bul ṭan a ngai. Ruihhlo donaah chhung tinte'n mawhphurhna kan nei a, kan tihhlawhtlin turah dah ṭheuh ila, nasa takin ruihhlo donaah kan hlawhtling thei ang," a ti.

Kohhran, YMA leh tlawmngai pawl te, sorkar department leh mimal, ruihhlo donaa theihtawp chhuahtute chu fakawm a tih thu sawiin Deputy CM chuan, chief minister Zoramthanga kaihhruaia din Ruihhlo Do Core Committee-in ruihhlo do beihpui thlâkna atana cheng nuai 300 a ruahman chu ṭangkai taka hman a nih thu a sawi.

Excise & Narcotics minister Lalrinawma pawhin thu sawiin, "Ruihhloin Mizoram a rùn nasat avangin sorkarin rálkhèl dár a vua a ni ber. Ruihhlo vanga Mizo ṭhalai, a bikin mipa tam takin mual an liam hi a pawi tak zet. Vawiinah hian ruihhlo kan do hneh loh chuan naktuka kan hun tur a lungchhiatthlak hle ang," a ti.

Inkhawm hi Social Welfare & Tribal Affairs secretary Udit Prakash Rai-in a kaihruai a; Mizoram Drug User Forum president Lalduhawma Chawng-thu leh Central YMA assistant secretary Prof. Malsawmliana ten thupui an sawi.

Ruihhlo dona ni hmannaah hian ruih theih thil tite enkawla an tana thawk ṭhin kohhran leh pawl 11 hnenah chawimawina hlan a ni. Deputy CM hian 'Handbook on Ruihhlo Do' a tlangzarh bawk. Kumina ruihhlo dona ni thupui chu 'Mihring ngaihven hmasak: Thinhrikna leh thliarhranna tihtàwp a, invenna tihchak' tih a ni.

International Day Against Drug Abuse and Illicit Trafficking pualin Aizawl Police-te chuan nimin zing khan Millennium Centre aṭanga Aizawl SP pisa thleng kawngzawh (rally/walkathon) an huaihawt a, DIG (Northern Range) Lallianmawia'n vailiamin, Modern English School zirlai te, Aizawl DEF hnuaia thawkte leh traffic police-te an tel.

Aizawl SP pisa tuala kawng­zawh kharna inkhawm chu Aizawl bawrhsap Dr Lalhriatzuali Ralte-in a hmanpui a; ruihhlo donaa thawk ṭha mi pathum - Vaivakawn Police Station officer in-charge inspector Dhian Singh Minhas, Sairang PS OC sub-inspector J Lalchungnunga leh Aizawl DEF-a sub-inspector T Thuamchungnunga te hnenah chawimawina thuchei hlan a ni.

Ruihhlo dona ni, International Day Against Drugs Abuse and Illicit Trafficking hi Lungleiah chuan Saikuti Hall-ah hman a ni a, minister Dr R Lalthangliana'n hmanpuiin, poster insiamsiak lawmman a sem.

Dr R Lalthangliana chuan, ruihhlo donaa kohhran, YMA leh pawl dang te, department leh mimal ṭhahnemngaihna leh thawhrimna fakawm a tih thu a sawi a; Social Welfare department hmalaknaa Mizoram puma ruihhlo do beihpui thlak kalpui mek a hlawhtlin theih nan theihtawp chhuah chhunzawm turin kal khawmte a sáwm.

Champhaiah chuan minister of state TJ Lalnuntluanga hoin District Hospital-ah hman a ni a; Minister hian police-te'n October 2022 aṭanga February 2023 inkara ruihhlo an man heroin kg. 12.5, methamphetamine kg. 20, ganja kg. 6.35 leh alprazolam mûm 450, a vaiin cheng nuai 378 hû a hâl.

TJ Lalnuntluanga chuan, Champhaiah NDPS Act ngaihtuahtu tur Special Judge Court a hrana dah a nih theih nan hmalak mek a nih thu leh tih tur ṭulte tihfel mek a nih thu a sawi. Inkhawmah hian ruihhlo donaa police officer thawk ṭha mi 20 hnenah chawimawina leh GM Higher Secondary School-a On the Spot Slogan Writing Competition-a ti ṭha zual mi 10 hnenah lawmman a sem a ni.

International Day Against Drug Abuse and Illicit Trafficking hi Lawngtlaiah chuan Police bultumin Areopagy-ah hman a ni a, additional SP C Lalruatkima'n a kaihhruai.

Lawngtlai Police-in high school zirlaite tana essay inziahsiak leh lemziak intihsiak an buatsaiha lawmman sem a ni a; police, sorkar hotute leh zirlaite'n ruihhlo ṭhat lohzia puanzarna thuziak hrang hrang kengin Areopagy aṭangin kawng an zawh bawk.

Mamitah chuan ruihhlo dona ni pualin nimin zing khan Mamit Field Veng aṭangin Charkawn thleng ruihhlo do kawngzawh buatsaih a ni a; District Hospital-a incinerator-ah Mamit district-a ruihhlo man chinfel tawh Rs 28,35,260 hû hal a ni.

Mamit Chhimveng YMA Hall-ah District Narco Coordination Centre buatsaihin hun hman a ni a, bawrhsap VL Remliana'n a hmanpui.

International Day Against Drug Abuse and Illicit Trafficking puala New Diamond School-a lemziak intihsiak lawmman sem a ni.