Mizoram pumah internet 4G-in a la thlen loh khaw 66 a awm

Press Information Bureau (PIB) leh Central Bureau of Communication (CBC) chuan nimin khan thuthar thehdarhtute tan Aijal Club-ah central scheme kalpui dan inhrilhfiahna media workshop an buat­saih. Mizoramah internet 4G-in a la thlen loh khaw 66 a awm a, kumin 2023 chhungin thlentir hman tum a ni tih tarlan a ni.

'Digital profile of Mizoram' tih thupui sawitu Vanlal­­ringa tarlan danin, Mizoramah internet 4G-in a la thlen loh khua 66 a awm a, chu'ng khuate chu kum 2023 chhungin thlentir hman tum a ni. Khaw 66-a 4G thlentirna tura hma latu (implementing agency) atan BSNL ruat a ni a, tower 60 phun belh a ngai tura chhût a ni. 5G pawhin Mizoram a thleng tawh a, Jio-in kumin January 27-a an tih ṭan hnuah Airtel-in February 14-ah an ti ṭan ve leh nghal.

'Skill India Mission: Innitiatives in Mizoram' tih thupui sawitu Lalmuan­awma, LESDE deputy director chuan, Apprenticeship Act-in a phût angin factory-a mi 30 aia tam chhawrte'n apprenticeship training an kalpui ngei a ngaih thu a sawi a, "Apprenticeship training an kalpui loh chuan hrem theih a ni a, hremna chu pawisa chawitir a ni," a ti. Zawhna chhangin, Mizorama factory zingah mi 30 aia tam chhawr awm mahse training kalpui an la awm lo tih a sawi.

Media workshop-ah hian Social Welfare & Tribal Affairs department-in central scheme a kalpuite chungchang sawitu deputy director Dr Lalnunmawii chuan, rualbanlote'n awlsam zawka ina an làwi luh theih nan wheelchair nawr kalna (ramp) siamnaah an pui thei tih a sawi a, "Scheme kan nei a, department hrang hrangte hian ramp siam ngai pawimawh se, kan department-ah project rawn thehlut se, kan lo tihpui thei. Tun thlengin building 27-ah ramp kan siam tawh," a ti.

Loneitute tana central scheme awmte chungchang sawitu Agriculture deputy director Dr Samuel Lalliansanga chuan, PM-Kissan hnuaiah June 6, 2023 thlengin mi 2,02,415 an inziah luh tawh thu te, mi 41,465 hnenah ṭanpuina pek kim a ni tawh a, chuta tan chuan cheng nuai 21,903.7 sên a nih thute a sawi.

LESDE deputy director Lalmuan­awma tarlan danin, LESDE department hian central scheme PMKVY an kalpui a, PMKVY 2.0 chhungah mi 13,650 hnenah skill training pe tura tih an ni. Skill training tur hian mi 12,869 inziak lut aṭangin mi 12,835 chu training an pe a, mi 9,550 chu skill training certificate pek an ni. Mi 6,097-in hna an hmu a, a tam zawk chu India chhim lama thawk an ni.

Media workshop 'Vartalap' hawnna inkhawm-ah hian PIB director (Imphal Region) Dr Engam Pame-a'n zirhona buatsaih chhan a sawi a; khuallian Dr ZR Thiamsanga, MLA, khualzahawm PB Lianthangpuii, IPR joint director leh, special guest C Lalrambuatsaiha, MJA president ten thu an sawi.