CSS thil phûtte July 2023 chhunga tihhlawhtlin Chief Minister-in a tiam

All Mizoram CSS Employees Coordination Committee (AMCECC) chuan Study team on CSS rawtna tihlawhtling tura Mizoram sorkar nawr nan nimin khan hna an thawk lo. Nimin veka chief minister Zoramthanga nen an inbiaknaah, an thil phûtte July 2023 chhung ngeia tihhlawhtlin CM-in a tiam avangin nawrh an titàwp.

Tarlan tawh angin, AMCECC hian an thil phut tihlawhtling tura sorkar nawr nan June 20-23 chhung khan badge dum belin hna an thawk a; awmzia a neih loh avangin ni thum awh turin nimin aṭang khan pen/tool down strike an kalpui ṭan a ni. Pen/tool down strike kalpui avang hian CSS hnuaia thawkte chu an hnathawhna hmun an an kal tho a, hna erawh an thawk lo.

Chief Minister-in a sàwm angin AMCECC hruaitute chuan nimin chhun khan CM Zoramthanga chu a pisaah an hmu a; sorkara an phût - CSS hnuaia thawkte dah ngheh (regularise/absorb), medical reimbursement neih ve leh recruitment rules siam chungchangte an sawiho a ni.

AMCECC tarlan danin, inbiaknaah hian Chief Minister chuan, regularisation/absorption scheme siam te, sorkar hna nghet lâkah CSS-a thawkte tan hmun hauh (reservation) siam leh, CSS-te tana recruitment rules siamte chu July 2023 chhung ngeiin Cabinet-ah ngaihtuah a, tihhlawhtlin ngei a nih tur thu a lo hrilh.

AMCECC hruaitute chu nimin khan Chanmari YMA Hall-ah an ṭhukhawm nghal a; an thil phûtte Chief Minister-in tihhlawhtlin a tiam avangin pen/tool down strike an kalpui chu an titawp lailâwk tih tarlangin AMCECC chuan, "July thla chhung ngeia Chief Minister-in min tiamte hi Cabinet-in min pawmsak lo a nih chuan kan awm dan tur ngaihtuah ṭhat leh a ni ang," an ti.

AMCECC chuan, sorkar laka an lungawi lohna an lantir avanga mipui tawrhnate pawi an tih thu an tarlang a; an harsatna mipuiin an hriatthiampuinaah an lawm thu an tarlang bawk.