Cheng nuai 534 hû ruihhlo hâl a ni

Mizoram police-in ruihhlo an man zinga chinfel tawh cheng nuai 534 hû chu nimin khan International Day Against Drugs Abuse and Illicit Trafficking denchhenin Trinity Hospital, Silaimual thil halna (incinerator)-ah additional DGP Ajay Choudhry hoin hâl a ni a; Mizoram hmun dangahte pawh hàl a ni.

Ruihhlo hâl puala inkhawm tawi buatsaih chu DIG (CID) Lalhuliana Fanai-in a kaihruai a; Addl. DGP chuan, ruihhlo doa rim taka thawk ṭhinte a chhuan thu sawiin, "Ruihhlo man a nih hian a hlutna zat a pawimawh ber lo. Ni tin a pung zel hi engtin nge kan tih­ziaawm theih ang tih a pawimawh," a ti.

Ajay Choudhry chuan, Mizoram chu ruihhlo tawlhna kalkawng a nih avangin fimkhur zual a ngai tih sawiin, "Sum siamna awlsam a nih avangin ṭhalaite ruihhlo tawlh lamah an tlân nasa. Ruihhlo vangin kan ṭhalaite an bo pil kan phal tur a ni lo," a ti a, ruihhlo donaah ṭanrual a ṭul tak zet thu a sawi.

Additional DGP chuan, ruihhlo dona atan Mizoram Police-in resource an nei ṭha lo tih sawiin, "Resource kan nei ṭha lo chungin kan thawk nasa hle. Kan resource neih ang angin ruihhlo do kawngah theihtawp kan chhuah zel ang," a ti.

Nimina Aizawla ruihhlo hâl hi heroin kg. 17.88 leh metham­phetamine kg. 65.32 a ni a; tualchhunga hralhna angin cheng nuai 534 hu a ni. International market-ah erawh chuan cheng nuai 22,009 hû a ni thung.