ZPM-in beih kan tâwk nasa - Duhoma

ZPM leader Lalduhoma chuan, tunlaiin an party-in beih an tâwk nasa a, an sawi loh pui sawi anga miin an puhnate chu hunin a dikna a la rawn hril dawn thu a sawi.

Lalduhoma hian nimin khan ZPM pisaa inkhawmah thu sawiin, "Tunlai hian kan party-in beih kan tâwk nasa hle a, kan sawi loh pui sawia inpuhna te, party boruak chhia leh buai tak angin min puangzar a, heng zawng zawng hi a dikna chu hunin a rawn hril dawn a ni," a ti.

'ZPM an inti ṭha bik, an intithianghlim bik, kohhran hi kan unit an ti,' tihte vawrh darh a ni tih sawiin Duhoma chuan, "Party dang sorkar tawhte eng mah ṭhatna nei lo leh chhe lailet dêra puh angin min sawi bawk ṭhin. Hetiang hi kan party hian kan sawi ka la hre ngai lo," a ti a; party dangte eng mah thawh nei lo leh chhe lailet dêr anga an sawina chu party dangte'n dah chhuak ngam se an duh thu a sawi.

ZPM Leader chuan, corruption, health care leh sorkar hnathawk hlawh chungchang leh thil dang dang an sawi ṭhin thu sawiin, "Mimalin kan bei ngai lo a, keini erawh mimal takin na tak takin min bei a, tualthat ang hialahte min puh. MNF leh Congress-te hi hun rei tak Mizoram enkawl tura ruat an lo ni tawh a, thil ṭha tam tak an ti. Mahse, hunin thil a her liampui ṭhin a, ZPM hun a inher chhuak ve dawn ta niin a lang," a ti.

ZPM Leader chuan, "ZPM chhungkua hi buai hlea min chhuah an tum a, he party din tirh ata theihtawp chhuahin min bei char char reng. Leader chungchangah te, thawhhona chungchangah te, CM chungchangahte buai leh kal hlei thei lo turahte min ngai. Pu Sapdanga nen kan inkar chungchangte pawh kan sawi zing lutuk tawh. Heng an sawi zawng zawng hi dik se, ZPM hian vawiin hi kan thleng lo ang a, kan pung hek lo ang. Mahse, kan lian tual tual a, bial tinah hma kan sawnin ZPM-ah an lo lut zut zut reng a ni," a ti a; buaia an puh laiin ZPM-in hma an sawn zawk niin a sawi.

ZPM ṭhan dan sawiin Duhoma chuan, "Kum 2018 tir lamah khan bial tinah a mawngphah kan ni a, kum tawpah kan inthlang a, Pathian zarah bial riat kan chang a, bial tam takah pahnihna kan ni bawk. Kum 2018-a kan harsatna chu, bial vil tur leh ding tur kan harsatna kha a ni a, tunah chuan kan lo lian ta hle a, kum 2018 letling chiahin kan awm ta a, kan luhai dan pawh a dang ta. Mi ṭha tak tak, party tana rinawm leh taima bial vil tur chang lo tam tak an awm thei ta hi a ropui hle a ni," a ti.

Bial vil tur chan loh vanga lungawi lo an awm chungchang sawifiahin Lalduhoma chuan, "Party chhungah harsatna lian a awm lo a, kan hritlang ve lík lék chauh a, damdawi-inah admit ngai an awm lo. He thil vanga party aṭanga chhuak ta hi mi tlem azawng Lunglei lamah an awm ve a, chu bak an awm lo. ZPM block leh unit bakah frontal lamte tunlai hian an ṭang hle mai a, candidate-te sum tihektu ni loa an mamawh sum pàitu zawk nih tumin inhlawhin an phe suau suau mai hi hmuh a nuam a, hei hi kalphung tharin a ken chu a ni, " a ti.

ZPM thuchhuah tarlan danin, ZPM Leader hian an party zawm thar mi 111 a lawm lut a, chu'ng zingah chuan zaithiam Ngurthangvela pawh a tel.