East-II ka tlanchhiatsan lo - RRRa

27th June, 2023

MNF adviser Robert Romawia Royte, MLA chuan nimin khan Mizo Hnam Rûna inkhawmah thu sawiin, a bial Aizawl East-II a tlanchhiatsan loh thu leh khawi bialah pawh ding tura a inpeih thu a sawi.

Robert Romawia Royte chuan, "Aizawl East-II ka tlanchhiatsan lo a, MNF candidate tan ka rochun zawk a ni. Kan Nomination Committee-te'n MNF candidate tur uluk takin an rawn thlang ang tih ka ring a, East-II bialah hian hneh takin a tling ang tih ka ring," a ti.

MNF Adviser chuan, a dinna tur Hachhek bial chu ramri hnaih leh hmun harsaa awm a nih thu sawiin, "Ruling party bialtu neih an chak ve tawh. Aizawl East-II ai chuan bial a hahthlak dawn tih pawh ka hria a, politics-a ka luh hian khawi bialah pawh ding turin ka inpeih sa hrim hrim a ni," a ti a; a dinna bial tur chu vuivaia a lak loh thu a sawi.

Robert Romawia Royte chuan, Manipur ráltlânte chungchanga tun hnaia Delhi-a a zin chungchang sawiin, High Level Committee on Internally Displaced Person-in ráltlânte a ngaihsak thu a sawi a; Delhi-ah Home Secretary a hmuhnaah Mizoram CM-in chhawmdawl a rawtna pawm a nih thu sawiin, "Manipur buaina chhuah aṭanga vawiin thlenga kan sorkar hmalakna a ropui a, kan CM inpekna a ropui a, Home department official-te an fakawm hle," a ti.

Robert Romawia chuan, SASCI Part-I 2023-24 atan sorkar laipuiin cheng nuai 20,000 a pek belh dawn thu sawiin, "In ka thlen rualin sanction order min rawn thawn," a ti a; SASCI chu kum 50 hnuah rulh chauh tur a nih avangin, kum 50 a vei hunah chuan rulh ngai zat tur cheng vbc. 700 chu eng tham mah a nih loh tur thu a sawi.

Sorkar tehna chu manifesto tihhlawhtlinah a nih thu sawiin MNF Adviser chuan, "Opposition party-te'n kan manifesto-ah min teh rawh se. Congress sorkar lai khan ‘Manifesto aṭangin min teh rawh se’ an ti ve ngai em? Pu Zoramthanga sorkar hi manifesto tihlawhtling tam ber a ni. Kan manifesto páwn lama kan thawh ringawt pawh hi Congress kum 10 sorkar chhunga mi a zat tawh hial ang," a ti. ZPM chu keh darh lo chi an nih loh thu leh ZPM-ah mipui an beidawn ṭan thu a sawi bawk.