DMR Minister-in lei tlahniam a enfiah

Disaster Management and Rehabilitation (DMR) minister Lalchamliana chuan nimin zing khan Hunthar Venga lei tlahniam siamṭhat mek a tlawh a; bialtu MLA C Lalmuanpuia, PWD leh DMR department hotute bakah, khawtlang hruaitute'n an ṭawiawm.

DMR Minister chuan, Hunthar venga lei tlahniam leh leimin vanga chhungkua eng emaw zat sawn chhuah a ngai chu pawi a tih thu a sawi a, "Lei tlahniam hi kum 1990 vel aṭangin zawi zawiin a chê a, kum 2016 báwr chho khan sorkar hmasa hun laiin DMR department chuan project a siam. Kum 2017-ah siamṭhatna a awm leh a, phai aṭangin technical mite pawh lo kalin eng emaw chen hmalak a ni," a ti.

Kum 2018-ah chief minister Zoramthanga hoin hmalak leh a nih thu sawiin Minister chuan, "National Disaster Management Authority-ah amah ngei kalin a zuk dàwr hnuah sorkar laipui lam mithiam pathum an lo kal a ni," a ti a; NDMA-in cheng vcb 20.8 a rawn pek chu sorkar laipui leh state sorkarin zat leh zat (50:50)-a intum sem tura an inremsiam hnuah hna thawh a nih thu a sawi.

Lalchamliana chuan, lei tlahniam ṭhin chu kawng thlang lam aṭanga dâwm tel tura hmalak a nih thu te, NH-54 chung lam zawng chu DMR department hmalaknain pile foundation leh SDA sak te, drainage, retaining wall, shaft well siam leh a dangte thawh a nih thu te, kawng thlang lam chu Mizoram sorkar sum hmangin PWD-in an khawih thute a sawi bawk.