Minister-in LMC pisa a tlawh

Minister Dr R Lalthangliana chuan nimin khan Lunglei Convention Centre leh Lunglei Municipal Council (LMC) pisa a tlawh a; LMC councillor-te leh sorkar hotute nen an inkâwm. LMC hotute chuan, chak zawka hma la turin thawktu (staff) an mamawh belh thu an lo thlen.

Dr R Lalthangliana chuan, LMC AX"Lunglei khawpui in enkawlnaah hmathlir thui tak nei u la, India rama municipal corporation/council-te hnathawh dan leh kalpung ṭhate zir chiangin, Lunglei khawpui milin regulation-te uluk takin duang ang che u," a ti a; an hmalaknaah mamawh an neihte sorkara thlen vat ṭhin turin a chah.

Bangladesh nena Mizoram insum­dawn tawnna chu Kawrpuichhuah kaltlangin tihpuitlin thuai tum a nih thu sawiin Minister chuan, "Land Ports Authority of India chuan detail project report cheng nuai 52,000 hû sorkarah kan thehlut tawh. Zorinpui leh Zokhawthar hi India rama trade centre 20 thlan zingah an tel a, heng border trade hmalaknate hian Lunglei district chu thui taka a nghawng dawn a ni," a ti a; ei leh bara intodelhna turah leh ram danga thawn chhuah tur siam leh tharah ṭan lak a ṭul thu a sawi.

LMC chairman Lalzuithanga chuan, Lunglei khawpui enkawlna tura regulation hrang hrangte chu uluk taka an duan mek thu leh vawiin hian LMC Board of Councillors ṭhutkhawm hmasa ber neih a nih tur thu a sawi a; chak zawka hma la turin thawktu an mamawh belh thu a sawi bawk.

Minister hi Lunglei HPC vice chairman Lawmawma Tochhawng, MLA, Lunglei additional DC Donny Lalruatsanga leh official dangte'n an ṭawiawm a ni.