Ainawn Venga sorkar quarters ngaihtuah nawn turin sorkar ngen

General Adminis-tration Department (GAD) chuan June 22, 2023 khan Ainawn Venga sorkar quarters eng emaw zat chu a him loh avanga ṭhiah a ṭulin, in luahtute chu ni 60 chhunga an chenna chhuahsan tura a tih tawh chu Congress party chuan ngaihtuah nawn leh se an duh thu an tarlang.

MPCC thuchhuah tarlan danin, June 18, 2023-a Council of Ministers ṭhukhawm chuan Ainawn Venga sorkar building/quarters-te chu chhiat-rupna thleng thei pumpelh nan tihruah a, ṭhiah turin thutlukna a siam.

Chumi bawhzui chuan GAD chuan, June 22, 2023 khan Ainawn Venga sorkar quarters type I, II, III leh IV luahtu chhungkaw 100 chuang chu ni 60 chhunga chhuak turin a hriattir a ni.

GAD thuchhuah chuan chhungkaw tam tak tan manganna a thlen nia sawiin MPCC chuan, "MNF sorkar hian ngaihtuah nawn leh se tih hi Congress party duh dan a ni. Quarters luahtu chhungkaw harsa tak takte dinhmun hre rengin, tun aia awmze nei zawka hmalakna nei turin sorkar kan ngen a ni," an ti.

Sorkar lehkhaa a lan danin, Ainawn Venga sorkar quarters luah mektute chu chhungkaw 161 an ni a; sorkar phalnaa luahtute chuan thla tin sorkarah house rent allowance (HRA) an chawi ṭhin a ni.

MPCC chuan, Ainawn Venga sorkar quarters, chhungkaw eng emaw zatin an luah laite chu chei ṭha turin Congress party-in MNF sorkar an phût nia sawiin, "Chenna atana a him lo tih chhuanlama a luahtute dinhmun leh rilru tur hriatthiampui duh loa chhuahtir a tum hi a nunràwnthlak. Chenna atan a him lo a nih pawhin a tahtawlin siamṭhat hna sorkarin a sum neih dan milin a thawk mai turah kan ngai," an ti.