KHAWTHLIR

Thisen pe

Thingsulthliah Higher Secondary School NSS chuan nimin khan an sikulah blood donation camp an huaihawt a, Civil Hospital, Aizawl tan thisen unit 71 an pe. PYD (Mizoram) Bilkhawthlir Bial pawhin Kolasib District Hospital tan nimin khan thisen unit 35 an pe a, petute mipa 27 leh hmeichhia pariat an ni.

Zu leh meizial man

Assam Rifles leh Champhaia Customs department mite chuan nimin khan Zokhawtharah Myanmar aṭanga lak luh zu leh meizial tam tham tak an man a, Rs 88,98,800 hu a ni. June 24, 2023 pawh khan Assam Rifles leh Excise & Narcotics department mite'n Champhai Zote huam chhungah Rs 35,77,000 hû heroin an man bawk.

Press card hlân

Champhai DC James Lalrinchhana chuan nimin khan Champhai leh Khawzawl district-a press accreditation hmu thar mi 14 hnenah press accreditation card a hlan a; MJA member thar pathum - Champhai aṭangin mi pahnih leh Khawzawl mi pakhat hnenah lawmpuina thilpek a hlan bawk.

Black Day hmang

BJP, Mizoram chuan kum 1975-a sorkar laipuiin ram puma national emergency a puan hriatrengna nimin khan an pisaah an hmang. Emergency Black Day tia an vuah hi a ni tak (emergency puan ni tak) chu June 25 a ni a, kuminah Pathianni a nih avangin nimin khan an hmang a ni.

Minister-in hawng

Minister Lalruatkima chuan nimin khan a MLA fund Rs 6,49,000 sêng Gairigaon Primary School building zauhna sak thar a hawng a, Dinthar High School-a tlawh nghal. Minister hi Dinthar Local Council leh pawl hruaitute'n an ṭawiawm a; zirna chu ram leh hnam din chhuahna pawimawh a nih thu leh nu leh pate'n mawhphurhna pawimawh tak an neih thu sawiin, "Khawvelah zirna hian tawp ni a nei lo a, inzir reng tur kan ni," a ti. Gairigaon P/S hi kum 1962-ah din a ni a, zirlai 115 leh zirtirtu paruk an awm mek a, Minister hian whiteboard pathum a pe nghal. Dinthar H/S tan Study Tour neihna tur Rs 50,000 a pe bawk.