Mizoram sorkar hnathawk pension hun kum 62-a tihsan chungchang sawiho
Department of Personnel & Administrative Reforms (DPAR) buatsaihin nimin khan Secretariat conference hall-ah Mizoram sorkar hnathawkte pension hun kum 60 aṭanga kum 62-a tihsan chungchang sawiho a ni.
Sawihona hi DPAR secretary Lalramnghaka'n a kaihruai a; Finance Secretary emaw a aiawh emaw, Federation of Mizoram Government Employees and Workers (FMGEW) President, Secretary General leh Treasurer bakah, Central YMA, MUP, MHIP, MZP leh MSU aiawhte tel tura sàwm an ni.
Vanglaini thu dawn danin, sawihonaah hian FMGEW aiawhte chuan pension kum tihsan ṭul an tih thu an sawi chhuak hlawm a; ṭul an tih chhan ber chu - sorkar hnathawk indaih lohna a ni. Sorkarin a hnathawk tur a lak tam theih loh avangin sorkar hnathawk indaih lohna a nasat thu leh, pension kum tihsan a nih chuan sorkar hnathawk indaih lohna a ziaawm phah deuh an beisei thu an sawi.
Zirlai pawl pahnih - MZP leh MSU aiawhte chuan sorkar hnathawk pension hun tihsan chu ṭha an ti lo a, ṭhalai hna zawng mekte tana sorkar hna a vàn tawh em em laia sorkar hnathawk pension hun tihsan a nih chuan ṭhalaite an chêp lehzual dawna an ngaih thu an sawi. Sorkar hnathawk pension kum tihsan chu an pawm ngai dawn lo tih an sawi bawk.
Hetih lai hian, MZP leh MSU aiawhte chuan, sorkarin a mamawh zual thiamna bik ngai eng emawah chuan sorkarin pension hun a pawhseisak tawh ṭhinte an sawisel ngai loh thu pawh an sawi.
Central YMA leh MHIP lam chuan sorkar hnathawk pension hun chungchangah sorkarin thutlukna a siam ang ang an pawm theih thu an sawi nia thu dawn a ni.
FMGEW hian May 19, 2022 khan an thil phûtte ziakin chief minister Zoramthanga hnenah an lo thlen tawh a; an thil phût zingah chuan pension hun kum 60 aṭangin kum 62-a tihsan a tel. Sorkar laka lungawi lohna lantir an tum tawhna ṭhina an thil phût zingah pension kum tihsan a lo tel tawh ṭhin bawk.
Pension kum tihsan...
* FMGEW-in an duh a, sorkar an dil mek
* MZP leh MSU-in an duh lo, an dodal
* CYMA leh MHIP-in sorkar thutlukna ang ang an pawm