Rualbanlote tan bika sum dah tura tih ni mah se; Mizoram sorkarin a la dah lo

Rualbanlote hamṭhatna tura The Rights of Persons with Disabilities (RPwD) Act, 2016-in bung 15-naa a tarlan, rualbanlote tan bika sum dah (State Fund for PwD) tura state sorkar-te a tih chu Mizoram sorkarin a la tipuitling lo.

Persons with Disabilities (PwD) Commissioner office chuan nimin khan Police Headquarters multipurpose hall-ah rualbanlote dikna chanvo leh hamṭhatna kaihhnawih dan, The Rights of Persons with Disabilities (RPwD) Act, 2016 chungchangah inràwnkhawmna an buatsaih a, kohhran leh pawl hrang hrang aiawhte an tel.

Inràwnkhawmnaah hian, rualbanlote hamṭhatna tura RPwD Act, 2016 Chapter 15-a tarlan, rualbanlote tan bika sum dah (State Fund for PwD) tura state sorkar-te tih chu Mizoram sorkarin a la siam lo tih tarlan a ni a; rualbanlo anga inchhála rualbanlote chanvo dawngtute chu kum hnih chhung lung-ina tàn leh Rs 1,00,000 chawi tura hrem theih a nih thu leh, sorkar hnaah rualbanlo tan 4% aia tlem lo hauh tur a nih thute tarlan a ni bawk.

Consultation Meeting with Stakeholder hi PwD commissioner Vanlaldiki Sailo-in a kaihruai a; Mental Health state nodal officer Dr Robert L Khawlhring leh J Thankima College-a assistant professor Lalbuatsaiha ten thupui an sawifiah.

Kal khawmte chuan thupui hrang hrang - rualbanlote tana hna 4% aia tlem lo hauh chungchang te, rualbanlo certificate pek dan te, rualbanlote'n zalen taka hun an hman theih dan tur te, vantlang hmunah rualbanlote tana remchanna siam te, damdawi-in leh zirna-ina rualbanlote hamṭhatna leh rualbanlote vote thlaktir chungchangte an sawiho.

Mipui, pawl, kohhran leh sorkarin rualbanlote tana hma an lak dan leh hmalak ṭulna te, mipui hnenah rualbanlote dikna leh chanvo hrilh tam a pawimawh thu te, sorkar laipuiin rualbanlote enkawl dan tura dan a siamte Mizoram sorkarin a taka a tihhlawhtlin theih nan hmalak a ṭul thu te, rualbanlote'n an chanvo dik tak an chan theih nana hmalakna tur leh harsatnate an sawi a ni.

INRAWNKHAWMNAA TARLAN DANGTE

■ Zirna-inte'n rualbanlote an admit duh lo a nih chuan hrem theih an ni.

■ Vantlang hmunhma, zirna-in leh biak-inah rualbanlote tan awlsam taka an kalna tur siamsak tur a ni.

■ Damdawi-in leh healthcare centre-ah rualbanlote ngaihsak hmasak tur a ni.

■ Zirna sang (higher education)-ah rualbanlote tan seat 5% hauh a ni.

■ Rualbanlote chu India khua leh tui an nih chuan vote an thlak theih nan remchang siamsak tur.

■ Rualbanlo tu pawh, ama duhthlanna leh remtihna tel lo chuan fa nei thei loa siam ngawt phal a ni lo.