Kum 1961-ah Zo hnahthlak inzawmkhawm kan buaipui tawh tih Manipur CM ka hrilh - Zoramthanga

MNF president Zoramthanga chuan, tun hnaia Manipur chief minister N Biren Singh nen an inbiaknaah, MNF-in kum 1961 aṭangin Zo hnahthlak inzawm khawm chungchang an buaipui tawh thu a hrilh niin a sawi.

Zoramthanga hian nimin khan Saitual Auditorium-a Ṭawi East Block Conference a hmanpuinaah thu sawiin, "Manipur CM nen kan inbiaknaah MNF hian a din tirh, October 22,1961 aṭangin Zo hnahthlak inzawm khawmna chung­chang kan lo buaipui daih tawh tih thu ka hrilh. Tun thlengin MNF chuan Zo fate rorelna pakhat hnuaia awm hi kan la bei reng a ni," a ti.

MNF chu Pathianin mak tak leh hriatthiam harsa takin a hruai nia sawiin Zorama chuan, "MNF hian harsatna tam tak a paltlang tawh a, tun thlengin harsatna a la tâwk reng. Hruaitute ṭhat leh fel vang ni loin, Pathianin harsatna ata min dâwm kâng zel ṭhin," a ti a; MNF chu India rama party upa ber zinga mi leh tlo ber zinga mi niin a sawi.

Zoramthanga chuan, 'MNF-in eng mah an ti lo' tia sawi ṭhin an awm nia sawiin, "MNF sorkar hnuaia hmasawnna tam takte hi en rawh se. MNF sorkar hian a thil tih tum ang a ti lo tia demtute hian, Covid vanga khawvel ram dangte'n an tih tum an tih bik lohzia an hriat a ngai a, dam khawchhuah kan tum hram hram zawk a ni," a ti.

MNF President chuan ZPM chungchang sawiin, leader nihna an inpek chu dan bua inziak lo a nih avangin thuneihna inpek dan thiam a harsa dawn niin a sawi a, "Thuneitu ber pawh hriat theih an ni lo. An chapo avangin an tâlbuai mek a, kalphung thar hritlànin an hritláng a, an báng sup sup mai," a ti a; MNF an sorkar leh ngei dawn niin a sawi.

MNF adviser R Lalzirliana pawhin thu sawiin, "Politician ni lote'n politics an khelh hian harsatna a thleng ṭhin. Party hrang hrang aṭanga kal khawm, hming thlak fo ṭhin ZPM an tâlbuai mek," a ti a; Aizawl mayor Lalrinenga Sailo-in thu a sawi bawk.

Inkhawmah hian Zoramthanga'n MNF party-ah mi 339 a lawm lut niin MNF thuchhuah chuan a tarlang.