Sangau-ah zirlaite'n lungawi lohna lantir

Blue Mountain High School, Sangau aṭanga Headmaster sawn chhuah tawh chu a awmna ngaia dah lêt phût vang leh Blue Mountain H/S-a post ruakte hnawhkhah phût vangin zirlaite leh Lai Students' Association (LSA) chuan June 26, Thawhṭanni aṭang khan lungawi lohna an lantir a, nimin pawh khan zirtirtute an dang chhunzawm.

Blue Mountain H/S zirlaite'n lungawi lohna an lantir hi LSA Sub-Hqrs, Sangau chuan an thláwp a; Blue Mountain Higher Secondary School leh Sangau Higher Secondary School (RMSA)-a LSA branch-te'n thláwpin lungawi loh lantirnaah an telpui.

Sangau khuaa H/S pakhat leh HSS pahniha zirlai 200 chuang chuan sit-in demonstration an kalpui a; hei vang hian sikul pathumte chu nimin khan khar a ni.

Blue Mountain H/S-a headmaster Denghmingliana chu thla thum chauh a la thawk hman tihin tun hnai khan sawn chhuah a ni a, amah thlaktu dah a nih loh avangin dah lêt an phût a ni. Mizo subject zirtirtu post pakhat leh LDC leh 4th grade post-te a ruak a; zirtirtu thawk mek zinga pahnih chu headmaster-ah an kaisan avangin hmun dangah an thawh a ngai dawn bawk niin an tarlang.

LSA Sub-Headquarters, Sangau president B Laldinliana chuan, an thil phût tihhlawhtlin a nih loh chuan sikul kal loa sit-in demonstration kalpui chhunzawm zel an tum thu a sawi.