SASCE sum hman dan avangin Lokayukta-ah ZPM Ṭhalai an zualko

ZPM Ṭhalai chuan nimin khan Spe­­cial Assistance to States for Capital Expenditure (SASCE) sum Mizoram sorkarin a hman dan chhui tura ngenna Mizoram Lokayukta-ah an thehlut.

ZPM Ṭhalai chuan, SASCE hnuaia Mizoram sorkar hnathawh hrang hrang an zirchiannaah thil fel lo tam tak hai lan a nih thu an tarlang a, "SASCE hnuaia a taka hmuh tur awm lo hnathawh te, a hmun dik tak ni loa hnathawhte leh dik lo taka sum hmanna uchuak tak tak hai lan a ni. Hetiang hi chhui chiang a, thil dik lo titute'n hremna an tawh ngei theih nan Mizoram Lokayukta-ah FIR kan thehlut a ni," an ti.

ZPM ṭhalaite chuan, "Mizoramin central aṭanga kan leibat SASCE, kum 50 chhunga Mizoram mipuiin kan inrulh ṭâwm tur hi mipui mamawh tur hmasawnna hnathawhna aia party fund ang maia MNF sorkarin a kalpui hi a pawi kan ti," an ti a; SASCE hmangin Chief Minister-in MNF bial viltute a campaign-tir tih an tarlang.

Mipui sum hmanga hna thawh a nihin mipui mamawh ro tling siam ni se tih chu an dinna a nih thu sawiin ZPM Ṭhalai chuan, "Mizoram mipui leiba inṭâwm SASCE hi mimal tute emaw sum siamna atan mai maia hman hi kan phal lo," an ti.