MPYCC-in Martarte Lungphunah hun hmang

Mizoram Pradesh Youth Congress Committee (MPYCC) chuan nimin khan CTI, Sesawnga Martarte Lungphun an din kum 26-na champha hriatrengna hun an buatsaih a, Congress Legislature Party (CLP) leader Zodintluanga Ralte-in a hmanpui.

Zodintluanga Ralte chuan, Sesawng CTI hmuna Martarte Lungphunah rambuai vanga thi mi 1,168 hming ziah lan a nih thu sawiin, "Khatih hun lai khan Congress sorkar kha lo piang lo se chuan tuna kan lungphuna hming kan ziah lêt hi ziah a ngaih hial ka ring," a ti.

MPYCC president Laltawnliana pawhin thu sawiin, "Ram leh hnam tana nunna chán tate chu ṭhangtharte thinlungah an dâi tawh ngai dawn lo a, kan hre reng tawh dawn. Kum 1997-a kan din Martarte Lungphunah hian politics a awm lo tih hi Zoram mipuite'n min hriat nawnsak se ka duh. Politics khelh nana martarte hman chìn hi a ṭha lo," a ti.

MPYCC tarlan danin, CTI, Sesawnga Martarte Lungphun hi martarte hriat­rengna lungphun hmasa ber a ni a, June 27, 1997 khan khatih laia MPCC president Lal Thanhawla'n a hawng. Rambuai laia hnam sipai leh civil mi thite hming 1,168 ziah a ni tawh.