Maumual ram ṭheh thawh khatnaah SEDP aṭangin Rs 5,00,000 dah a ni

Mizo National Front returnee-te tana Chaltlang Maumual rama chenna in ngaihtuah tura din 'Maumual Development Committee for MNF Returnees' chu nimin khan an chairman Lalruatkima, Land Revenue minister hoin a pisaah an ṭhukhawm. Minister chuan, Maumual ram ṭheh thawh khatnaah SEDP aṭangin Rs 5,00,000 dah a nih thu a sawi.

Lalruatkima chuan, kum 1986-a India sorkar leh MNF-te'n inremna thuthlung an ziah hnua hnam pasalṭha hawte pualin Maumual ram ṭheh a nih thu a sawi a, "A hmun hi kha'ng hun lai kha chuan hla deuh leh thlaler deuha a lan avangin in sa duh pawh an awm mang lo niin a lang. Tunah chuan hmun ṭha leh rem tak a lo ni tawh. Sorkarin Ex-MNA-te in leh lo ngaihtuahsak a ngaih pawimawh avangin theihtawp chhuah a ni," a ti.

Kum 1987-a House Site Plan siam tawh chu uluk zawk leh thiamna changkang zawk hmanga siamṭhat a nih thu sawiin Minister chuan, "LRS department chuan surveyor tirin mumal taka survey nei vek tawhin, plot pawh siam a ni," a ti a; siamrem ngai la awmte chu siamrem nghal zel tura hmalak a nih thu a sawi.

Minister sawi danin, Maumual ram ṭheh chu thawh (phase) hniha kalpui a ni a, thawh khatnaah SEDP aṭangin Rs 5,00,000 dah a ni. Thawh hnihna pawh kalpui thuai tura hmalak ṭan mek a ni. Maumual ramah hian mimal ram bakah mipui vantlang hmun tur - anganwadi, sikul, taxi stand leh ṭul dangte a awm dawn a, in zawng zawng kawngpuiin a pawh vek dawn a ni.

Ṭhutkhawmah hian LRS department-in survey an neih aṭanga house site plan/plot siamte thlirho a ni a; July thla chhungin engkim peih tum a nih thu an tarlang.

Maumual ram chhunga ram nei inhriattir zat chu mi 863 an ni a; report lut aṭanga house-site plan chhunga awm tih hriat mai theih 452 awmin, plan chhunga mi tih hriat mai theih loh 411 an awm. Plot allotment siam zawng zawng chu 677 a ni a, plot sût leh ram neitute kuta pek 61 a awm bawk.