LMC-in truck terminal 2 siam ṭha an ti

Lunglei Municipal Council (LMC) Board of Councillors (BoC) ṭhutkhawm vawi hnihna nimin khan BoC Meeting Hall-ah neih a ni a; Lunglei khawpui chhim leh hmar lamah truck terminal siam an rêl.

LMC BoC ṭhutkhawm hi chairman Lalzuithanga'n a kaihhruai a, Lunglei High Powered committee vice chairman Lawmawma Tochhawng, MLA-in a chhim. Kum 2023-24 chhunga hmalakna tur eng emaw zat a pawm a; hmalakna tura an pawmte chu chipchiar zawkin Mizoram sorkara Cabinet meeting pawmpui turin thehluh a ni ang.

LMC chuan, Lunglei khawpui chhim leh hmar lamah truck terminal siam tum ni se, an ti a; Lunglei khawpui hmun pali - hmar lam, chhim lam, khawchhak lam leh khawthlang lamah bawlhhlawh sawngbawlna, solid waste management centre changtlung zawk din tura hmalak an rêl. Urban local body sum aṭanga siam turin Rain Water Harvesting Project siam an rêl bawk.

Lalzuithanga chuan, LMC chu bul ṭan chauh an nih avangin councillor-te chu a taka hnathawhna tur sum hmuh a nih hmaa nasa zawka inzir turin a chah a, "In ngaihtuahnate hmang zauin, sum hmuh a nih veleh chak taka hna thawk thei nghal turin lo intuaihriam ang che u," a ti a; BoC meeting chu thla thum danah neih tur ni mah se, bulṭan tur an nih avangin chu aia zinga ṭhutkhawm a ngai dawn thu a sawi.

MLA Lawmawma Tochhong pawhin thu sawiin, councillor-te chu an hmachhawpte tihlawhtling turin theihtawp chhuah tur leh hun lo la awm zel tur thlir chunga Lunglei hmasawnna hna thawh thiam a ṭul ti hre turin a chah a; state sorkar nen ṭha taka an thawhho zel a beisei thu a sawi bawk.

LMC BoC ROREL DANGTE

* LMC chhunga hmun pawimawh enkawl ṭhat leh cheibawl ṭhat

* LMC Complex nei tura hmalak

* Mizoram Municipalities Rules & Act hmanga a theih chin chinah LMC chhunga hmalak

* Draft Lunglei Municipal Council Rules By Laws siam hmasak ni se

* Account Committee member atan Ward-IV councillor Lalramzauva, Ward-VIII councillor Malsawmkimi Khawlhring, Ward-VI councillor R Lalremsiama leh Ward-X councillor Judy Lalhriatpuii te ruat an ni.