Insawifiah tura tih a nih angin MDC Dr Lorrain insawifiah

Lai Autonomous District Council (LADC)-a Lawngtlai Chandmary bial aṭanga MDC ni tura thlan tlin Dr Lorrain Lalpekliana Chinzah chuan insawifiah tura hriattir a nih angin June 26, Thawhṭanni khan insawifiahna lehkha LADC-ah a thehlut.

Lorrain Lalpekliana Chinzah hi kum 2020-a LADC General Election-ah khan independent candidate niin, Lawngtlai Chandmary bial aṭangin MDC atan thlan tlin a ni a; May 30, 2023-ah ZPM party a thlàwp thu a puan avang leh ZPM-in Mizoram inthlanpuia an candidate tur ṭhenkhat June 12-a an puanah a tel avangin LADC dan a bawhchhiaah ngaiin LADC chuan June 26, 2023 ral hmaa insawifiah turin June 20 khan a hriattir a ni.

Dr Lorrain Lalpekliana'n dan a bawhchhiat lai nia LADC chairman VL Hmuaka'n a tarlan chu, The Lai Autonomous District Council (Constitution, Conduct of Business etc) Rules 2020-a Rule 11(6)(b) a ni.

ZPM chuan an social media-ah, Dr Lorrain Lalpekliana Chinzah chuan June 26 khan insawifiahna lehkha a thehluh thu an tarlang. Meghalaya-a Khasi Hills ADC leh Mizorama Chakma ADC-a MDC-te paih (disqualify) theihna tur dan an siam CCB Rules chu Gauhati High Court-in a ṭhiat/hnâwl tawh tih tarlang bawkin, "ADC-te hian MDC disqualify-na tur dan siam turin thuneihna an nei lo, tiin judgement a lo siam tawh a ni," an ti.