KHAWTHLIR

Thisen pe

Helen Lowry Higher Secondary School NSS unit chuan nimin khan an sikulah thisen pek an huaihawt a, Civil Hospital, Aizawl tan thisen unit 50 an pe a, petute mipa 31 leh hmeichhia 19 an ni.

Heroin man

Assam Rifles leh Excise & Narcotics department mite chuan June 26, Thawhṭanni khan Ṭhuampui leh Falkland Veng inrìnia pengṭhuamah heroin gram 191 an man a, Rs 1,33,70,000 hû a tling. Ruihhlo kawltu mi pahnih - Lalnunsanga (22) s/o Khawpthanga, Sakan, Myanmar leh Elbat (48) s/o Tuanlian, Khawmawi, Myanmar te lakah thubuai ziah luh a ni.

Tuitla ruang hmu

June 25, 2023-a Tlawng luia tla hlum Albert Malsawmtluanga (23), Vaitin (Bawngkawn South-a khawsa mek) ruang chu nimin zing dar 4:40 khan a tlâkna aṭanga hla lo têah hmuh a ni.

Library leh digital

Pachhunga University College-a Central Library chuan nimin khan library-a tunlai thiamna hman ṭangkai dan zirhona, 'Digitising Library Services Using Modern Technology ' an buatsaih. Seminar hi vawiinah chhunzawm a ni dawn a, library-a digital technology hman chungchangah mithiamte thuziak zirho a ni.

Mizo Kristian thu leh hla zirho

Mizoram Christian College-a Mizo depart­ment chuan nimin khan Synod Conference Centre-ah Mizo Kristian thu leh hla zirchianna an buatsaih a, Rev. Prof. Vanlalnghaka Ralte khuallian a ni. Prof. RL Thanmawia'n Mizo literature chungchang a sawi hawng a; Mizoram University leh Aizawla college hrang hranga literature lama mithiam eng emaw zatin an thuziak an chhiar a, sawiho a nih bakah zawhna leh chhànna hun hman a ni.

BSF nen inkhel

Border Security Force (BSF) 163 battalion chuan tualchhung mite nen inkungkaihna ṭha an neih theihna atan nimin khan Tlabungah football friendly match an buatsaih a; BSF sipaite leh Tlabung Zodin ṭhalaite'n football an khêlho.

Thing keuh sak

Mamit district-a West Bunghmun branch MHIP member-te chuan an khuaa khawhar chhungte tan thingfâk phur khat ṭheuh an keuh ṭhin.