Pension kuma 60 aia tam hmang India ramah state paruk an awm
India rama state 28 zingah state sorkara hnathawkte pension hun kum 60 aia sang hmang state paruk an awm a, state dang 22 chuan kum 60 leh a aia hniam pension kum atan an hmang.
Mizoram sorkar hnathawkte pension hun kum 60 aṭanga kum 62-a tihsan chungchangah Department Personnel & Administrative Reforms (DPAR) buatsaihin June 27, 2023 (Thawhlehni) khan Secretariat conference hall-ah inràwnkhawmna buatsaih a ni a, DPAR secretary Lalramnghaka'n a kaihruai.
Inràwnkhawmnaah hian DPAR leh Finance department hotu te, Federation of Mizoram Government Employees and Workers (FMGEW) hruaitu te, Central YMA, MUP, MHIP, MZP leh MSU aiawhte an tel.
Mizoram sorkar hnathawkte pension hun kum 62-a tihsan chungchang sawihonaa DPAR lamin an tarlan danin, India rama state 28 zingah state panga-in pension hun atan kum 62 an hmang a, state pakhatin kum 61, state 17-in kum 60, state pasarihin kum 58 leh state pakhatin kum 56 an hmang mek a ni.
Pension kum 62 hmangtu state panga zinga Andhra Pradesh chuan kum 2022 aṭangin an hmang a, Madhya Pradesh-in kum 2018-ah hmang ṭanin, Chhatisgarh-in kum 2013 aṭangin an hmang. Pension kum atana kum 61 hmangtu awm chhun Telangana chuan kumin 2023 aṭangin an hmang.
Kum 60 hmang mektu zingah Tamil Nadu chuan kum 2021 aṭangin an hmang a, Arunachal Pradesh-in kum 2017-ah an hmang ṭan. Hetih lai hian, Kerala state sorkar chuan a hnathawkte pension hun atan kum 56 a hmang mek a, India ram state zinga pension kum hniamna ber a nia hriat a ni.
Thu dawn danin, Mizoram sorkar hnathawkte pension kum sawihonaah hian FMGEW aiawhte chuan pension kum tihsan ṭul an tih thu leh an duh thu an sawi a; Central YMA leh MHIP lam aiawhte chuan sorkarin thutlukna a siam ang ang an pawm theih thu an sawi.
Zirlai pawl pahnih - MZP leh MSU aiawhte chuan sorkar hnathawk pension hun tihsan chu ṭha an tih loh thu leh an dodal thu an sawi a; MUP aiawhte'n tihsan ṭul an tih loh thu an sawi bawk.