Kudam thar sak tur lungphùm phúm

Zuangtui Muanna Venga Supply Kudam chu Sairang Dintharah sawn a ni dawn a, chief minister Zoramthanga chuan nimin zing khan Sairang Dintharah kudam thar sakna tur lungphùm a phúm.

Kudam sakna atan SASCI leh NABARD aṭanga sum hmuh hman tur a ni a; SASCI 2022-23 aṭangin Rs 9,21,07,000 leh NABARD aṭangin Rs 4,85,94,000 hmuh a ni. Kudam zau zawng sq.m 1,220.86 a ni dawn a, buhfai metric ton 1,500 a leng dawn a ni.

NABARD aṭanga sum hmuh chu 'Construction of Warehouses with Associated Infrastructure in Mizoram' tih a ni a, kudam pahnih, metric ton 1,000 dâwl zo ve ve sak tur niin, sq.m 1,671.76-a zau tura ruahman a ni. Staff quarters sakna tur a tel bawk.

CM Zoramthanga chuan, Sairanga rêl lut tur nen Sairang Dinthara Supply kudam sak tur chuan awlsamna nasa zawk a thlen a rin thu a sawi a, "Mizoram hmun hrang hranga buhfai sem darhnaah awlsamna a thlen dawn. Buhfai phur truck lian kalnain khawpui chhung traffic a tihbuai loh nan PM-DeviNE kaltlangin by-pass road siam a ni dawn a, tunah hian Aizawl chhim lam aṭanga Mizoram hmar leh khawchhak lam panna tur ruahmanna siam mek a ni," a ti.

Mizoramin hamsawnna tur theihna ṭha a neih chu hai chhuah thiam a ṭul thu sawiin Zoramthanga chuan, "Hmathlir thui tak, tum sang tak leh lian tak neih a pawimawh. Mizoramin tun hnaia harsatna a tawhte hi nasa zawka hmasawnna tur atan chonaah lak ni se," a ti a; Zuangtui kudam hlui chu ṭangkai taka hman tum a nih thu a sawi.

FCSCA minister K Lalrinliana pawhin thu sawiin, khawpui ṭhang zel avangin kudam sawn a ṭul thu a sawi a, "Sairang Dinthara Supply kudam thar tur chhak chiahah FCI kudam sak mek a ni a, Tanhril FCI kudam aṭanga Supply kudama man to tak taka buhfai phurhnaa sum sèn ral ṭhin kan hum thei dawn a ni," a ti.