Remna Ni pualin thing phun a ni

Chief minister Zoramthanga chuan nimin khan New Capital Complex-a Open Gym-ah Remna Ni vawi 38-na puala thing phun hnatlang a hawng. CM hian Remna Ni vawi 38-na pual hian hampuar (balloon) a thlawh chhuahtir a, Thlado thing a phun nghal.

CM Zoramthanga chuan, kum 1986-a MNF leh sorkar laipuiin remna thuthlung (peace accord) an ziah hmangin Mizoramah remna leh muanna tluan tling a thlen thu a sawi a, "Rambuai lai chuan Mizoram chu manganna, rálṭitna leh au thâwmin a luah khat ṭhin a, India hmarchhak mai ni lo, Asia khawmualpuia chhimchhak ram ralmuang lo ber a ni hial. Tunah chuan hnam sipai huaisente zarah India rama state ralmuang ber leh mi dangte entawn ber a ni ta," a ti.

Mizoram rálmuanna chu state dang leh ram dangte awh ber a nia sawiin Zoramthanga chuan, "Mizoramin thawn chhuah tur a neihte zinga hlu ber pakhat a ni," a ti a; Mizorama sahimna zawnga rawn lutte chu hmangaihna nena lo tuamhlâwm tura Mizoram mipui a chah bakah, Mizoram chu state ralmuang ber a nih zel theih nan thawhpuiah a sáwm.

Chief Minister chuan, khawvel boruak inthlak danglam nasa vanga khuarel chhiatna thleng thei laka him nan environment humhalh a pawimawh thu te, Mizoramin theihtawpa hma a lak mek thute a sawi bawk.

Remna Ni puala thing phunnaah chief secretary Dr Renu Sharma, GAD secretary K Lalthawmmawia leh conservator of forest (CC) Lalrammawii Sailo te pawhin thu an sawi a; principal chief conservator of forest RK Singh chuan ceremonial tree planting lawmpui nan Chief Minister leh Chief Secretary hnenah thingṭiak a hlan a ni.