Sangauah zirtirtu dang chhunzawm
Lai Students Asso-ciation (LSA), Sangau leh Blue Mountain High School, Sangau zirlaite chuan a záwna a ni thumna atan nimin khan sikul bulah sit-in demonsrtation an chhunzawm a, zirtirtute sikul kai tur an dang. An thil phutte tihhlawhtlin a nih hma chuan lungawi lohna an lantir zel dawn nia thu dawn a ni.
Tarlan tawh angin, Blue Mountain H/S-a headmaster K Denghmingliana, Mathematics zirtirtu ni bawk chu tun hnaiah sawn chhuah a ni a, chumi duh lohna lantirna atan leh zirtirtu post ruak dangte leh LDC leh 4th grade post ruakte hnawhkhah phûtin June 26, 2023 aṭang khan sit-in demonstration an kalpui a ni.
K Denghmingliana hi Blue Mountain H/S-ah thla thum a thawk hman chauh tihin South Vanlaiphai H/S-ah sawn a ni a; Blue Mountain H/S-a zirtirtu dang, tun hnaia headmaster-a kai sang L Hmingchungnunga chu Bualpui NG H/S-ah sawn niin, K Suiawra chu Sangauah vek dah a ni.
Sangaua zirlaite thil phût hi sorkarin a tihhlawhtlin hma chuan lungawi lohna lantir chhunzawm zel an tum niin Sangau aṭanga thu dawnna chuan a tarlang.