Vety Minister-in hmunhmá a tlawh

Animal Husbandry & Veterinary minister Lalrinawma chuan nimin khan Ramrikawna ran chaw herna hmun, Animal Feed Plant leh Tanhrila ar notê awp keutirna hmun, Zoram Poultry Development Society Hatchery Farm a tlawh.

AH&Vety Minister chuan, sa leh artuiah Mizoram a intodelhna tura AH&Vety department-in hma an lak tawhnate'n rah ṭha a chhuah tih a sawi a; ran chaw herna leh ar awp keutirna hmuna thawkte chu Mizoram intodelh theih nan theihtawp chhuah turin a chah.

Animal Feed Plant chu kum 2003 vela din a ni a, kum 2018 khan cheng nuai 523.53 sêngin ran chaw herna hmun kháwl leh hmunhma dang bun belh a ni. Ran chaw herna khawl pahnihah ni khatah ran chaw quintal 120 vel her chhuah ṭhin a ni a; layer leh broiler chaw chi thum ve ve, vawk chaw leh bawng chaw an siam chhuak ṭhin. AH&Vety deputy director Dr V Lalzarzova chuan, ran chaw an siamte chu phai aṭanga lak luh aiin a tlawm zawk tih a sawi.

Zoram Poultry Development Society Poultry Hatchery Farm chu May 2015-ah hawn a ni a, amaha a intun nun theih nan AH&Vety department chuan kum 2015 khan revolving fund Rs 40,00,000 a pe.

Farm hian artui 25,70,740 leh artê 16,98,100 a tichhuak tawh a, sorkarah revenue Rs 32,85,679.89 a chhung lût tawh bawk.