Puilo RURBAN Commercial Centre hawng

Rural Development minister Lalruatkima chuan nimin khan Puilo RURBAN Commercial Centre a hawng. Centre hi Ministry of Rural Development-in Shyama Prasad Mukherji Rurban Mission (SPMRM) kaltlanga sum a pek nuai 292.98 sênga sak a ni.

RD Minister chuan, thingtlang hmasawnna turin scheme hrang hrang kaltlangin Rural Deve­lopment department-in hna a thawk a, India ramah SPMRM cluster 300 awm zingah Mizoramin cluster pali - Aibawk Block, Khawzawl Block, Thingsultliah Block leh East Lungdar Block-te an neih thu a sawi a, "Thingtlanga chêngte'n eizawnna ngêlnghet leh tlo an neih theihna tura kawng kawhhmuh hi SPMRM tum ber a ni a, hna tam tak kan thawk a, a hlawhtlinna kan hmu chho zel a ni," a ti.

Hmasawnna kawnga ke an pênnaah vawi leh khatah khawvel dang hmasawnna ang neih nghal vek theih a ni lo tih sawiin Minister chuan, "Keimahni theihna leh inbuatsaihna nen kal kawpin, kan phâk chinah rualpáwl turin theihtawp kan chhuah zel a ni," a ti a; Puilo Commercial Centre chu dimdâwi taka enkawl tur leh ṭangkai tana hmang turin a chah.

Puilo RURBAN Commercial Centre satu chu Lyrics Construction, Tuikhuahtlang a ni a, January 10, 2022-ah sak ṭan niin, December 28, 2022-ah sak zawh a ni. January 10, 2023 aṭangin khawl chi hrang hrang bun ṭan a ni a, June 10, 2023 khan bun zawh a ni.

RURBAN Commercial Centre-ah hian thlai enkawlna leh dahṭhatna tur pindan leh khawl chi hrang hrang dah a ni a; tuizem pali, ruahtui khawlna tur tuizem, 5 KVA generator dah a nih bakah, a bulah zana truck dahna tur siam a ni. Centre hi Tuivawl Ràl CLF-in an enkawl ang.