National Statistics Day hmang

Nimin khan Economics & Statistics Directorate buatsaihin Economics & Statistics Conference Hall-ah National Statistics Day vawi 17-na hman a ni a, Planning & Programme Implementation secretary Lalmalsawma Pachuau-in a hmanpui.

National Statistics Day inkhawm hi Economics & Statistics director B Lalrinhlua'n a kaihruai a; khuallian Lalmalsawma Pachuau chuan, hmasawnna hna bul ṭanna atan statistics a pawimawh hle tih sawiin, a pawimawhzia mipuiin an hriat theih nan inzirtir kawngah ṭan la zel turin a chah.

Lalmalsawma Pachuau chuan, India ram pumah Agriculture Census neih mek a ni a, zawh a ni ṭêp tawh tih a sawi a; ni tin birth and death statistics report lâk khawm ṭhin a ni tih sawiin, "Multi-Dimensional Poverty Index census pawh neih tum mek a ni a, kan ram dinhmun leh kan ram mi retheite dinhmun zirchianna pawimawh tak a ni dawn," a ti.

National Statistics Day hi Father of Indian Statistics Prof. PC Mahalanobis pian champha June 29-ah hman ṭhin a ni a, kuminah sorkar chawlh ní a nih avangin nimin khan hman a ni. Kumina thupui chu 'Alignment of State Indicator Framework with National Indicator Framework for Monitoring Sustainable Development Goals' tih a ni. Mizoram Economic & Statistics department thupui chu ‘One state, One statistics’ tih a ni thung.

Statistics Day hmannaah hian chawhnuah Day thupui zirhona buatsaih a ni a, Planning under secretary Isak Lalmuanpuia Chuaungo leh SDGs Coordination Centre consultant Zopuii Khiangte ten thupui sawiin, sawihona hun hman a ni.