Nature Learning Centre lungphùm phúm
Environment, Forest & Climate Change (EFCC) minister TJ Lalnuntluanga chuan nimin khan Champhai Zotlang hmun hluia Botanical Garden-ah Nature Learning Centre (NLC) dinna tur lungphùm a phúm.
Sorkar thuchhuah tarlan danin, Nature Learning Centre (NLC) hi National Mission on Himalayan Studies-in Himalayan tlangdung state pariat, biodiversity chi hrang hrang nei ṭha tak taktea ramngaw, nungcha leh leilungte ṭha zawka humhalh a nih theihna tura din a ni.
NLC dinna atan cheng nuai 399.04 ruahman a ni a, kum thum chhunga hna thawh zawh tur a ni. Hmalakna tur zingah thawktu tur lak te, nature tour buatsaih te, amphitheatre nature trail, mini museum leh orchidareum siam te, ram dang aṭanga dan loa nungcha leh thlai lak luh enkawl/khawina tur siam te, nature camp tihna tur hmanraw lei te, seed orchard din te, solar power bun te, thing hming chhinchhiahna leh herbarium siamte a tel.
EFCC Minister chuan, nikumah Champhai Zotlang hmun hluiah Botanical Garden project lungphùm phùm a nih thu sawiin, "Vawi leh khata hlawhtling nghal mai tur ni lo a, a hlawhtlin nan hun duh deuh tur a ni. Ṭangkai taka hman a nih theih nan mipui hnenah a nihphung leh ṭangkainate inzirtir a ṭul," a ti.
TJ Lalnuntluanga chuan, kumin September thlaah Champhaia Conservator of Forests pisa thar hawn tum a nih thu te, Tlangsamah sahuan tenau (mini zoo) dinna turin phalna ziakin hmuh tawh a nih thu te, ecotourism leh cultural centre dinna tur buaipui mek zel a nih thute a sawi bawk.
Nature Learning Centre lungphùm phùmna inkhawmah hian Champhai DC James Lalrinchhana pawhin thu a sawi a; Champhai district forest officer Lalduhthlana'n NLC chungchang sawifiahin, NLC leh Botanical Garden chu project kal kawp leh innghêng tlat tur a nih thu a sawi.