KHAWTHLIR

YMA-in thisen pe

YMA, Zotlang Branch leh Venghlui Branch ten Remna Ni pualin nimin khan Synod Hospital Blood Bank-ah thisen an pe. Venghlui Branch-in unit 15 pein, petute mipa 13 leh hmeichhia pahnih an ni a; Zotlang Branch-in unit 14 pein, petute mipa 13 leh hmeichhia pakhat an ni.

Meizial man

Assam Rifles chuan nimin khan Ruantlang, Champhai district-ah ram dang meizial bawmpui 70 an man a, Rs 91,00,000 hû a tling. Foreign cigarette hi AR sipaite chuan Champhaia Custom Preventive Force hnenah an hlàn chhâwng a ni.

Sorkar chawlh

General Administration Department chuan, vawiin June 29, Idu'l Zuha chu Mizorama bank leh financial institution dangte tan chawlh (holiday) a ni tih a puang.

Press card sem

Kolasib district bawrhsap John LT Sanga chuan nimin khan a pisaah Kolasib district-a accredited journalist 12 hnenah Press Accreditation Card a hlan a, ram leh hnam tana rinawm taka thawk zel turin duhsakna a hlan. Press accreditation card dawng tur hian sorkar hriatpui media firm-ah kum nga tal thawh a ngai a, card hi March 2025 thleng a nung dawn a ni.

Covid vei pasarih

Nimin khan Mizoramah Covid-19 vei mek mi pasarih an awm a, an zinga pakhat chu June 27, Thawhlehnia hmuh chhuah a ni. Mizoramah swab sample 19,96,534 endik tawh aṭangin Covid positive mi 2,39,542 hmuh a ni tawh a, mi 733-in an thihpui tawh a ni.

Lirthei tlan khap

NH-44A Tuidam kawnghlui chu siamṭhat hna thawh mek a nih avangin Mamit SP Lalthangpuii Pulamte chuan helai kawngah July 1-31, 2023 chhungin lirthei tlan khap a nih thu a tarlang a, thupek zawm lote chu u/s 179 MV Act hmanga hrem theih an nih thu a tarlang bawk.