State pumah Remna Ni lawm a ni

Nimin khan Mizoram hmun hrang hrangah Remna Ni vawi 38-na lawm a ni a, Aizawlah chuan GAD huaihawtin Vanapa Hall-ah hman a ni a, chief minister Zoramthanga khual­lian a ni.

CM Zoramthanga chuan, Mizoram buai chhan leh buaina chhuah dan te, remna nei tura beihna kawng thuizia leh harsatna te, Mizoram remna leh muanna nghehziate sawiin, remna chu Mizote'n puanzàr an zauh theihna tur leh mamawhte tana remna palai an nih ve theihna tura Pathianin a pek nia a rin thu a sawi.

Chief Minister chuan, Mizoram remna chu thil chi hrang hrang, a lian leh a tê zawm khawm hmanga siam a nih thu sawiin, "Tawrhna kara chung lamin thilpek ropui Mizo mipui a pek a ni. Hun kal zelah he remna hi remna tluantling a nihzia a chiang zel. India state dangah pawh remna ziah a nih fo tawh laiin, a tluan tling thei tak tak lo ṭhin," a ti.

Mizoram chàwi lârna tura Mizote'n an neih hrang hrang zinga mi dangin an neih ve loh chu remna leh muanna a nih thu sawiin Zoramthanga chuan, "Hei hi hmang ṭangkai a, kan ṭhenawm ram leh state-a buaina awm karah remna palai kan ni thei," a ti a; Mizoram remna chu mi dangin a zar an zo ve theih nan hmalak tum ṭheuh turin mipui a sawm.

Aizawla Remna Ni lawmna hi chief secretary Dr Renu Sharma-i'n a kaihruai a, Mizoram remna ngheh chhan chu mipui inpumkhatna leh mihring dikna chanvo ngaih pawimawh vang nia a hriat thu a sawi.

Mizoram Kohhran Hruai­tute Committee (MKHC) aiawha thusawitu committee member Rev. Lianhming­thanga Sailo chuan, Mizoramin remna a neih theihna atana kohhran hmalakna hrang hrangte a tarlang a, " Remna hi a man a to a, kan vawn nun zel a ṭul. Mihring tlemte awm, hnam bik rilru paihbo a ṭul," a ti a, Mizo nihnaah lawm a pawimawh thu a sawi.

NGO Coordination Commi­ttee chairman R Lalngheta pawhin thu sawiin, "He remna ni kan neih hi Zofa hmun tina awmte tan inremna thar a awm phahna nise kan duhthusam a ni. He ramah remna tluantling a awm zel theihna atan kan zavaiin ṭan i la thar ang u," a ti.

Remna Ni pual hian Sports & Youth Services depart­ment chuan nimin tlai khan Lammualah Peace Football Match an buatsaih a, CM Zoramthanga'n a hawng. Mizoram Professional Football Association leh Venghnuai Branch YMA football team an inkhel a ni.