Remna Ni pual thisen pek

Assam Rifles chuan Remna Ni pualin nimin khan hmun hrang hrangah tualchhung mite nen ṭang tlângin thisen pek rûnpui an huaihawt a, mi ṭhahnem takin thisen an pe.

Assam Rifles hotute chuan, Remna Ni puala nimina blood donation camp an huaihawtah thisen unit 116 pek a nih thu leh, chu'ng zinga pakua chu tualchhung mi (civilian) an nih thu an tarlang a ni.

Remna Ni puala thisen pek hi Aizawlah chuan 2nd AR hmunah MZP Gen. Hqrs nen ṭanghoin an huaihawt a, Civil Hospital, Aizawl leh ZMC blood bank tan mipa 82 leh hmeichhia pahnihin thisen unit 84 an pe. Thisen pe tur hian Aizawla awm sate bakah, Mimbung, Hnahlan, Champhai, Zokhawthar, Siaha, Lunglei leh Serchhip aṭangin AR sipaite an kal khawm tih AR thuchhuah chuan a tarlang.

Lungleiah chuan Assam Rifles sipaite leh John Williams Hospital-a thawkte'n Civil Hospital, Lunglei tan thisen unit 15 an pe.

Serchhip District Hospital Blood Bank-ah Remna Ni pualin thisen pek kalpui a ni a, June 14-30, 2023 chhungin mi 72-in thisen an pe bawk.