Remna Ni pualin Peace Walk neih a ni

Nimin Remna Ni-ah khan zing karah Mizoram hmun hrang hrangah Remna Ni pual kawngzawh, faina hnatlang, thing phun hnatlang leh free health camp buatsaih a ni.

Aizawlah chuan Tourism department buatsaihin Peace Walk huaihawt a ni a; Sikulpuikawn leh Chanmari kawn aṭangin mi eng emaw zatin kawng zawhin, Vanapa Hall kawtah an intâwk khawm a, minister Lalruatkima leh Tourism Development Board vice chairman TC Pachhunga ten an hmanpui. College, high school leh higher secondary school hrang hrang aṭangin Yuva Tourism Club member mi 1,400 vel an tel.

Lalruatkima chuan, remna thuthlung ziah hnuah Mizoramin harsatna leh buaina lian tham a tâwk lo tih sawiin, "Inunaunna leh thlamuanna boruak chám reng se ka duh," a ti a; remna tel lo chuan hmasawnna a awm thei lo tih hria a, remna vawn nun tum zel turin kal khawmte a chah.

Minister chuan zirlaite fuihin, "In nunphungah Mizo nun ze mawi - huaisenna, tlawmngaihna leh rinawmnate lang zel se, ram tana fahrin manhla ni ṭheuh ang che u," a ti.

Lungleiah chuan Kikâwn leh APC aṭangin Peace Walk huaihawt a ni a, Lunglei Venglaiah an intâwk khawm. Bawrhsap Ramdinliani hoin kalkawmte chuan Remna Ni thutiam an sawi rual a ni.

Remna Ni pualin Pukpui Centenary Park, Lunglei Park leh 3 Gate-ahte faina hnatlang huaihawt a ni a; Assam Rifles, BSF, Baptist HSS, Lunglei HSS leh Liantawna H/S zirlai te, Clean Lunglei volunteer-te leh UDPA department thawktute an tel. Lungleia damdawi-in hrang hrangah Remna Ni pualin free health camp buatsaih a ni bawk a, mi 300 chuang an inentir a ni.

Siahaah chuan Siaha District Sports Commitee (SDSC) bultumin New Siaha Vety Kawn leh District Playground inkarah Peace Walk huaihawt a ni a, SDSC chairman Lalhmunsanga Hnamte, bawrhsap ni bawkin a vailiam.

Champhaiah chuan Remna Ni pualin Peace Walk huaihawt a ni a; Champhaia sorkar hnathawk, zirlai, pawl aiawh, sipai báng leh Assam Rifles sipaite an tel a, Champhai New Market aṭangin bawrhsap James Lalrinchhana'n a vailiam.

Champhaiah hian Khankawn Police Checkgate leh Chhungte inkar NH-06 kawngpuiah thing phun hlatlang neih a ni a, Tlaizawng ṭiak 37 an phun. District chhunga khua/veng hrang hrangah VC-te kaihhruaiin faina hnatlangpui neih a ni a; Ngur khuaah District Hospital leh Ngur VC-te'n free health camp buatsaihin, mi 500 chuang an inentir a ni.

Serchhipah pawh Peace Walk huaihawt a ni a, additional DC James Lalnithanga'n a hmanpui. DC pisa leh IOC kâwn inkarah kawngzawh a ni a, Serchhip district-a sports association hrang hrang aiawhte bakah, Brilliant HSS leh New Serchhip Secondary School zirlaite an tel.

Serchhip khawpui chhung veng hrang hrangah faina hnatlang huaihawt a ni a; Serchhip Joint VC, YMA Sub-Headquarters leh EFCC department ten thing phun hnatlang an neih bakah, Health department-in Buangpui khuaah a thlawna inentirna an buatsaih bawk.

Remna Ni pualin Lawngtlaiah DC pisa, School Education department leh Samagra Shiksha ten Peace Rally an huaihawt a, Assembly deputy speaker H Biakzaua'n a vailiam. Kawngzawhah hian zirlai 100 vel telin, Areopagy aṭanga Chandmary Square thleng kawng an zawh a ni.

Mamitah pawh Peace Walk huaihawt a ni a, Mamita sorkar department hrang hrang, khawtlang hruaitu te, tlawmngai pawl aiawhte leh zirlai eng emaw zat an tel a, bawrhsap VL Remliana'n Charkawn aṭangin a vailiam a ni.

Hnahthial Hospital-ah Remna Ni pualin June 29-30 chhungin a thlawna inentirna buatsaih a ni a, Hnahthial leh a chhehvela mi 2,000 vel an inentir a ni.