Hmun hrang hrangah Remna Ni lawm a ni

Nimin kha India leh MNF inremna ziah ní, Remna Ni vawi 38-na a ni a, Mizoram hmun hrang hrangah lawm niin, minister leh MLA-te'n an hmanpui. Remna Ni lawmna atana zirlaite puala intihsiak chi hrang hrang buatsaiha ti ṭhate hnenah lawmman hlan a ni.

Deputy chief minister Tawnluia chuan Khawzawl Zaingen Branch YMA Hall-a Remna Ni lawmna a hmanpui a, Remna Ni chu Zoram mipui thawhchhuah, Zoram mipui tana siam a nih thu sawiin, "Kan zavaia ta a ni. Remna tluantling kan neih a, Remna Ni kan hman zel theih nan Zoram mipuite'n rilru leh thinlung zawng zawng nen theihtawp kan chhuah zel a pawimawh," a ti.

Deputy CM hian Remna Ni puala intihsiakna chi hrang hrang lawmman a sem a, Mizoram University-a Ph.D ti mek mi parukte laptop a hlan bawk. Inkhawm hi Khawzawl bawrhsap K Lalrohlua'n a kaihruai a, ennawn chi hrang hrang entir a ni.

Assembly deputy speaker Lalrinliana Sailo-in Mamitah Remna Ni hmanpuiin, Chhimveng YMA Hall-ah inkhawm buatsaih a ni a; "Remna leh muanna ramin a neih chu Zoram mipui ṭanrualna leh thawhhona ṭha tak vang a ni," a ti. Bialtu MLA H Lalzirliana, Mamit Joint VC Chairman leh Sub-Hqrs YMA President ten thu an sawi bawk.

Health minister Dr R Lalthangliana'n Hnahthialah hmanpuiin, Horeb Conference Hall-ah inkhawm buatsaih a ni a; tun hnaiah Myanmar, Bangladesh leh Manipur aṭangin tualchhung buaina avangin Mizo tam tak Mizoramah an ráltlân tih sawiin, "An dinhmun aṭang hian remna hlutzia a lang fiah hle. Remna hlutzia leh ropuizia i hre thar leh ang u," a ti. Inkhawmah hian sorkara secretary Esther Lalruatkimi pawhin thu a sawi.

Home minister Lalchamliana'n Keiṭum khuaa Sawngkhara Hall-ah Remna Ni lawmna a hmanpui a, remna ziah a nih khan India Constitution Article 371G telh a nih thu sawiin, "He Article hian Mizo hnam leh sakhua damna tur thui tak a hril a ni... Mizoram hi India rama state ralmuang ber a ni a, remna leh muanna kawngah Mizoram hi state dangte awh ber a ni," a ti.

Minister K Lalrinliana'n Kolasib-ah hmanpuiin, Diakkawn YMA Hall-ah Remna Ni lawmna inkhawm hman a ni a, remna hlut thiam a, remna siam tura ram leh hnam tan a inpete zah thiam tur leh remna a awm zel theih nan zirna leh intodelh lamah ṭan la turin ṭhalaite leh zirlaite a chah. Bawrhsap John LT Sanga leh mi dangte pawhin thu an sawi.

Saitualah chuan Saitual College auditorium-ah Remna Ni hman a ni a, minister Lalchhandama Ralte-in a hmanpui a, Saitual DC, SP leh officer dang te, khawtlang leh pawl hruaitute leh political party hruaitute an tel. Minister chuan, Mizoramah remna a awm theihna tura lalṭhutthleng kiantu Lal Thanhawla fakawm a tih thu sawiin, "A lalṭhutthleng kian duh lo se, inremna a khawtlai vek thei a, a inpekna a fakawm hle a ni," a ti a; khatih laia Lok Sabha MP Lalduhoma hmalakna fakawm a tih thu a sawi bawk.

Minister Lalrinawma'n Serchhipah hmanpuiin, DC Conference Hall-ah inkhawm buatsaih a ni a; "Remna hlu tak hi kan ram leh hnam hian ṭangkai taka kan hman theih nan mi tinin mahni zâwnah ṭheuh theihtawpin hna i thawk ang u," a ti. Inkhawm hi IPR deputy director K Saitluanga'n a kaihruai a, additional DC James Lalnithanga'n Remna Ni puala Serchhipa hun hman dan tlangpui a sawi.

Minister of state TJ Lalnuntluanga'n MZP Headquarters, Champhai buatsaih Remna Ni lawmna a hmanpui a, "Remna thuthlung ziah kan neih hi khawvela remna ziah hlawhtling ber pawl a nih avangin Remna Ni hi mipuite'n kan hlut thiam a ngai," a ti. Champhai bawrhsap James Lalrinchhana pawhin thu a sawi a; hnam làm leh zaite entira ngaihthlak a ni.

Remna Ni lawmna hi Assembly deputy speaker H Biakzaua'n Lawngtlaiah, government deputy chief whip Lalrintluanga Sailo, MLA-in Phullenah, Lunglei HPC vice chairman Lawmawma Tochhawng, MLA-in Lungleiah,

Mara Autonomous District Council chief executive member M Laikaw-in Siahaah an hmanpui a; Lok Sabha MP K Vanlalvena hoin Mumbai Mizoram House-ah hman a ni bawk.