Ruihhlo do tlang turin thuthlung ziak

Excise & Narcotics department (END) leh Champhai-Aizawl Maxi Cab Service Owners' Welfare (CAMS) chuan June 29, Ningani khan Champhai Vengthlang YMA Hall-a Drivers Meet cum Awareness-ah ruihhlo leh a kaihhnawih donaa thawhhona tur thuthlung an ziak. Thuthlung hi kum khat atan ziah a ni.

Champhaia END assistant commissioner Vanlalvura Ralte chuan, driver-te chu a taka mite dawrtu leh mi dangte tana malsawmna thlen ṭhintu an nih thu sawiin, "Hetih lai hian, a chhe zawngin dan phal loh ruihhlo te, ruihhlo kawltu leh zuartute phura ram leh hnam tana mi hnawksak in ni hlauh thei. In passenger leh bungraw phurhte fimkhur takin endik ṭhin ang che u," a ti.

Inkhawmah hian ruihhlo donaa awmze nei zawka thawhho dan turte sawiho a ni a; kal khawmte remtihna angin thawhhona thuthlung duante pawm a ni. Thawhhona thuthlungah hian END aiawhin Assistant Commissioner leh Officer-in-Charge ten hming an ziak a, CAMS aiawhin Chairman leh Secretary ten hming an ziak.

Thawhhona thuthlungah hian ruihhlo laka mimal, chhungkua, khawtlang leh ram leh hnam a him theih nana thawhho dan tur te, inzirtirna a tam thei ang ber nei tura thawhho dan tur leh pawimawh dangte a tel a ni.