MNF-in an intiamna an tihhlawhtlin loh a bua siam tham a awm - Lal Thanzara

Mizoram Pradesh Congress Committee (MPCC) vice president Lal Thanzara chuan, MNF-in an intiamna an tihhlawhtlin loh a bua siam tham a awm tawh thu a sawi.

Lal Thanzara hian nimina Hortoki-a Tuirial Block-I Congress Committee-in political training an buatsaihah thu sawiin, MNF sorkarah Chief Minister berin sum a âtchilh avangin a cabinet minister-te pawhin an âtchilh phah vek tawh niin a sawi a, "Sum an âtchilh nasat avangin an sorkar hmaa mipui hnena an thutiam zawng zawng pakhat mah tihhlawhtlin an nei lo a, an thutiam an tihhlawhtlin loh hi a bua siam tham a ni tawh," a ti.

BJP sorkar hnuaiah ram pum chu sawi loh, ṭhenawm state leh Mizoram ngeiah pawh politics avangin buaina a awm mek tih sawiin Thanzara chuan, "Politics hi ngaihven lo intite pawn Mizoram buai lai leh vawiin thlenga kan chhehvel dinhmun hi ngaihtuah ngun a hun tawh hle," a ti a, Mizoram politics dinhmun ngaih­ven a pawimawh thu a sawi.

MPCC Vice President chuan, sakhaw tih bik nei lo, Congress party chu sakhaw zalenna duhtu party an ni tih inhre turin an party mite a chah a, "Tu party emaw an sàn a, kan party a hniam kan tih vang ringawtin Congress party kan nghîng tur a ni lo. Therhlo beisei chunga party a awm chu party-ah kan beidawng fo," a ti.

BJP-in Mizoramah MLA pahnih khat tal an neih theihna turin nasa takin ṭan an la dawn tih sawiin Lal Thanzara chuan, "Sum pawh an theh chhuah tam ngam hle ka ring. Hei hi BJP-in an thawhpui MNF party an rin zawh tawh loh vang a ni," a ti a; Congress party chu Mizorama remna leh muanna a awm theihna tura Pathian ruat a nih thu a sawi.

Lal Thanzara chuan ZPM chungchang sawiin, "Pu Lal Thanhawla ten an khum an ken hial pawhin 'Chhuat daiah min muttir' a ti duh a, hetiang mi hi Chief Minister a nih ka ring lo," a ti a; ZPM hotu pakhat chuan, 'ZPM hian MLA 21 nei ta ila, kan sorkar ka ring lo, kan buai em mai' tiin a sawi niin a sawi bawk.