SEDP-ah vantlang huap bilh tel a ni - Lalruatkima

MND adviser Lalruatkima, minister chuan, an flagship programme, Socio Economic Development Programme (SEDP) chu mipuiin an hriat dan leh beisei dan a inang lo nia sawiin, SEDP-ah vantlang huap hmasawnna dah a nih thu a sawi.

Lalruatkima hian June 29, Ningani khan Dinthar Local Council House-a Aizawl West-II MNF Block Political Training-ah thu sawiin, "Mipuiin SEDP kan hriat dan leh kan chàn khàn a inang lo nasa a, chi hrang hranga hmasawnna kalpuina a ni. Vantlang huapa ruahmanna bilh tel a ni a, socio economic development a nih angin hmasawnna chi hrang hrang hna kalpui a ni," a ti.

SEDP chu kum 2021 aṭangin family oriented (mipuia pawisa sem)-in kalpui a nih thu sawiin Lalruatkima chuan, "Phase-I sem zawh tawh a ni a, Phase-II pawh kumin July thla chhungin sem a ni ang," a ti a; an duh anga SEDP an kalpui theih loh chhan chu Covid-19 leng vang a nih thu a sawi.

MNF Adviser chuan, zirtirtu indaih lohna phuhrûk nan SEDP hnuaiah zirtirtu 3,000 chuang lak a nih thu a sawi a; MNF party tluka hruaitu nei ṭha an awm lo niin a sawi bawk.