KHAWTHLIR

Dy CM-in tlawh

Deputy chief minister Tawnluia chuan June 29, Ningani khan Tualte khuaa Tomato Processing Centre sak mek a tlawh a; tomato chíngtute chu uar zawka chíng tur leh centre sak hna thawktute chu ṭha taka thawk turin a chah. Tomato Processing Centre hi SEDP sum nuai 50 sênga sak tur a ni.

AR-in heroin man

Serchhipa hmunpui nei Assam Rifles sipaite chuan nimin khan Champhai Zote-ah heroin gram 23 an man a, Zokhawtharah ram dang meizial báwmpui 92 an man bawk. Heroin leh foreign cigarette an man hi cheng nuai 207 vel hû a ni.

Zirlai chawimawi

MZP Sub-Headquarters, Kawlkulh chuan nimin khan Kawlkulh Town Hall-ah kumin HSLC leh HSSLC exam-a ti ṭhate chawimawina an buatsaih a, bialtu MLA Dr L Thangmawia'n a hmanpui. MLA chuan, "Mahni châk zawng leh tui zawng dam chhunga kan thawh theih nan tum mumal kan neih a ngai," tiin, zirlaite chu an tum tihlawhtling turin Pathian ráwn chunga nasa taka thawk turin a fuih.

Candidate puang

Lalpa Chhiahhlawh Intelkhawmte chuan nimin khan Zarkawt Community Hall-ah Pathian lal ram sorkar tana inkhawmpui an hmang. Kumina Mizoram Assembly inthlanpuia an candidate tur mi pali an puan belh a, chungte chu - Phirṭhianga, K Laldingliana (Aizawl West-II), Zonunsanga (Tuivawl) leh Biakchhunga Chinzah (Lawngtlai East)-te an ni. Inkhawmah hian 'Pathian lal ram sawrkar hmathlir 10' an tlangzarh bawk.

Chetsualnaah thi

Ramdinthari (49) w/o Lalthanzama, Buang khua, Champhai district chu nimin zing dar 7:15 vel khan lirtheia an chetsualnaah a thi. Thu dawn danin, Ramdinthari hi a fapa nen scooty-in Zokhawtharah intention an kal a, an haw lamah Kelkang leh Mualkawi inkarah truck nena intaiin, chetsualna hmunah hian a thi a; a fapa erawh ngaihtuahawm a ni lo.

Zirlai chawimawina MLA-in hmanpui

YMA, Venghnuai Branch chuan June 29, Ningani khan Rokunga Hall-ah an veng chhunga kumin HSLC leh HSSLC pass tharte chawimawina hun an buatsaih a, bialtu MLA Lalchhuanthanga’n a hmanpui. Lalchhuanthanga chuan, lehkhabu a tam thei ang ber chhiar tur leh ruihhlo laka inthiarfihlim turin zirlaite a chah. HSLC pass 31 leh HSSLC pass mi 29 hnenah chawi-mawina hlan a ni.