Health dept. sum hman dan Chhuina report thehlut tawh

Finance department chuan, Covid-19 dona atana Health & Family Welfare department sum hman dan endik turin June 8, 2020 khan Chief Controller of Accounts a hriattir a; chumi ang chuan Accounts & Treasuries hnuaia Special Audit Team-in June 18 khan an endik ṭan. Audit Team chuan an thil hmuhchhuahte chu thla hmasa khan Finance Commissioner hnenah an thehlut a ni.

Accounts & Treasuries aṭanga Vanglaini thu dawn danin, Covid-19 dona atana Health department sum hman dan bakah, department-in an hman ni chiah lo, Zoram Medical College (ZMC) lama sum an pek chhâwn hman dante pawh an chhui tel.

Special Audit Team chuan file hrang hrang an enfiah bakah, zawhfiah ngai a awm chuan a kaihhnawih khawihtu (mihring)-te thu an zawtfiah a; an thil hmuhchhuahte chu Finance Commissioner hnenah an thehlut a ni. Endik tur a tam avangin an endik zo hma thei lo.

Report-ah hian Special Audit Team chuan an thil hmuh chhuah hrang hrangte bakah rawtnate an thlen a, sorkarin a zir chian hnuah a ṭul angin bawhzui a ni ang.

Finance secretary Vanlal­chhuanga chuan, Health department sum hman dan endik (audit) a nih chungchangah politics thil a awm loh thu thuthar thehdarhtute zawhna chhángin a lo sawi tawh.

Audit chi hrang hrang a awm thu sawiin Vanlalchhuanga chuan, "Accountant General lam chuan external audit an ti ṭhin. Tuna Health department audit hi chu internal audit a ni a, a authority Finance department a ni em tihte a awm. Department-te hi audit vek tur an ni a, thawktu indaih loh vangin kan audit thei lo zawk a ni," a ti.

Finance Secretary chuan, Covid-19 dona atan Health department chuan hmun hran hran aṭangin sum an hmu tih sawiin, "Nakinah AG lamin an audit huna an buai lohna tura tih a ni. Political motive thil eng mah a awm lo a, invènpuina thil a ni," a ti a; AG-in external audit a tih chuan a kawng a thui avangin, tuna an audit chuan inpuahchahna hun a siamsak tur thu a sawi a ni.