Sahuan enkawl nan kum 5 chhungin cheng nuai 580 chuang hman a ni

Aizawl Zoological Park (Aizawl Sahuan) enkawl leh tihchangtlun nan kum 2022-23 chhung khan Rs 88,30,626 hman a ni a, kum 2018-19 leh 2022-23 inkarah khan cheng nuai 580 chuang hman a ni. Sahuanah hian ramsa 200 vel a awm.

RTI Act tlawhchhana zawhna Aizawl Wildlife Division SPIO-in a chhan danin, Aizawl Sahuanah hian ramsa chi hrang hrang 200 vel a awm. Sorkar kum liam ta, 2022-23 chhung khan Sahuana ramsate enkawl leh tihchangtlun nan Rs 88,30,626 hman a ni a; Sahuan tlawhtu mi 72,245 aṭangin Rs 12,03,120 an hmu thung.

Kum 2022-23 chhung khan Aizawl Zoological Park chuan Sahuan enkawl leh tihchangtlun nan sorkar laipui aṭangin Rs 2,61,000 hmuin, Mizoram sorkar aṭangin Rs 85,69,926 an hmu a, a vaiin Rs 88,30,926 an hmu.

Hemi kum vek hian ramsate chaw atan Rs 38,86,686 hman a ni a, Assam aṭanga Aizawl thlenga sakei phurh nan Rs 30,030, ramsate thil tihchhiat thawm ṭhat nan Rs 2,460, ramsate awmna (fruit bearing species) siam nan Rs 94,750, retaining wall siam nan Rs 1,41,000, environmental enrichment atan Rs 29,000, sakei awmna tur hungna siam nan Rs 36,47,000 leh rúl leh awlê awmna tur siam nan Rs 10,00,000 hman a ni a; sum hman zawng zawng Rs 88,30,926 a ni.

Aizawl Zoological Park hian sorkar kum 2018-19 leh 2022-2023 chhungin Sahuan enkawlna atan sorkar laipui aṭangin Rs 80,71,751 leh state sorkar aṭangin Rs 4,99,33,894 a hmu a, a vaiin Rs 5,80,05,645 a ni. Sum an hmuh zawng zawng chu Sahuan enkawlna leh tihchangtlun nan hman vek a nih thu SPIO chuan a tarlang.

Aizawl Zoological Park-ah hian enkawltu mi 20 an awm mek a, chu'ng zinga mi 11 chu a nghet loa thawk an ni. A ngheta thawk mi paruk awmin, director, range officer, peon leh chowkidar pakhat ṭheuh leh forest guard pahnih an ni a; a nghet loa thawk (provisional employee)-te chu forest guard, animal feeder, zoo cleaner pahnih, ward staff pahnih, security pali leh plantation mali pahnih an ni. Vety officer pakhat leh vety field assistant pakhat an awm bawk.

Aizawl Wildlife Division SPIO-in a tarlan danin, sorkar kum 2018-19 leh 2022-23 inkar chhung khan kum tin Sahuana ramsa hrang hrangte chaw atan cheng nuai 30-63 inkar sèn ṭhin a ni a; kum 2018-19 khan Rs 38,15,995, kum 2019-20 khan Rs 45,26,937, kum 2020-21 khan Rs 63,49,283, kum 2021-22 khan Rs 62,37,569 leh kum 2022-23 khan Rs 38,86,686 sèn a ni.

Aizawl Sahuana ramsate chaw supply hna chu tender chhuaha zawn ṭhin a ni a; supplier pahnih - VL Muanpuia (Rs 49,692 per day) leh Zohmingi Ralte (Rs 76,728 per day)-te an awm mek. Zohmingi Ralte hian bawngsa, bawng thin, kel sa, thingfanghma leh salt lick (ramsa chi) a pe a, VL Muanpuia'n a dang zawng a pe thung.

Ramsa chaw petute chu private contractor-te supply a nih avangin an lâkna an hriatpui loh thu Aizawl Wildlife Division SPIO chuan zawhna chhangin a tarlang a, "Feed quantity leh quality-te hi Zoo a lo thlenin check ṭhin a ni," a ti.