Kèl lak luh aṭangin hri a darh; Thinglianah kèl 150 a thi tawh

Serchhip district-a Thinglian khuaah ran natna vangin kêl 150 a thi tawh a, kêl 12 chiah a la dam. Kêl thih chhan hi Assam aṭanga kêl lak luhte'n hri an kài vang a ni a, chuta ṭang chuan an kái chhâwng ta zel nia thu dawn a ni.

Vanglaini-in Thinglian khuaa kelh vulhtu pawl hruaitute hnen aṭanga thu a dawn danin, Thinglian hi tun hma aṭanga kel vulh uar khua an ni a, tun hnaia kel an lak luh hmain kel 76 an vulh. May thla tawp khan state pawn aṭanga lâk luh kèl 86 an dawng a, chu'ngte nen chuan kel 162 an nei a ni.

State pawn aṭanga lâk luh kelte chu chhungkaw 80-in pakhat ṭheuh an dawng a, a bak paruk chu a pa, khawtlangin an vulh tura tih a ni. Kêl lak luh 86 zinga 79 thi tawhin, pasarih a la dam a, kel an neih sa 76-te pawh thi vein, 71 a thi tawh a, panga a la dam. Kêl an neih sa leh an lak luh chu a vaiin 162 a ni a, chu'ng zinga 150 chu thi tawhin, 12 a la dam a ni.

Kel vulhtute chuan, tun hnaia kel an dawn chu bialtu MLA Lalrinawma, minister-in duhsak taka a MLA fund aṭangin a tihsak a nih thu an sawi a, "Serchhipa mi Pu Hluntea, supplier-in vai ram aṭangin a la a. An rawn phur rei ang reng si a, Chawlhniin an rawn phur thleng a, hall-ah kan dah khawm a. Khung reng a ṭhat loh avangin Chawlhni tlaiah kan sem nghal. Kelah number kan awrhtir vek a, number kan pawt a, kan pawh number ang ang kel kan chang," an ti.

Kel an dawn zinga pakhat chu an insem tûkah a thi nghal tih sawiin, "An mahniin kan dahna ṭheuhah hri an kai ta zung zung mai a, an thi chak khawp mai. An thi nghal zawih zawih mai a, a ṭhen chu ni khat pawh an damlo hman meuh lo," an ti a; Vety doctor-te'n kelte chu an chiu char char a, mahse, nachhâwknate a ni a, awmzia a nei lem lo niin an sawi.

An kelte nat dan sawiin, "Assam aṭangin an rawn phur chho a, khu laiah an test tawh si lo a. Kawṭhaloin an ná a, a tirah chuan an mittui a tla a, an hnap a tui bawk. Chhung tinin damdawi kan neih ang angin kan enkawl a, keini pawhin MB vawi khat chiah kan pe hman," a ti.

Kel vulhtute sawi danin, kel thite chu Vety doctor-te'n sample an la a, phaiah endik a nih hnuah kêl natna chi khat, Peste des Petits Ruminants a ni tih finfiah a ni.

Thu dawn danin, MLA fund hmanga kel semte chu May 30, 2023 khan Thinglian khua phurh thlen a ni a, a tûk May 31-ah kelte chu an thi ṭan nghal a ni.