Hnam dang pasala nei Mizo hmeichhia MLA nih tumte MZP-in an dodal dawn

Mizo Zirlai Pawl (MZP) General Headquarters chuan June 30, 2023 zan khan Vanapa Hall-ah Remna Ni an lawm a, chief minister Zoramthanga khuallian a ni. MZP President chuan, Mizoram rorelna sangah Mizo hmeichhia, hnam dang pasal neite an awm ve an remti lo a, chutiang nih tum an awm a nih chuan theihtawpa an dodal dawn thu a sawi.

MZP president Lalnunmawia Pautu chuan, Mizo hmeichhia, hnam dang pasal neite zingah Mizoram rorelna sánga ṭhut tuma bei an awm tih sawiin, "MZP chuan ngun takin a ngaihtuah a, kan pi leh pu, kan sipai huaisen, hnam pasalṭhate'n zalenna, rorelna kan neih nana an sual chhuahah hian an ṭhut ve kan remti lo. MZP chuan theihtawpin kan theihna apiangah kan dodal zel dawn a ni," a ti.

Tun hnaiah sorkar hnathawk pension kum tihsan tumna a awm tih sawiin MZP President chuan, "Ṭhalai hna zawng tam tak, thiam tak tak an awm laia pension kum tihsan tumna hi MZP chuan a tàwp thlengin kan dodal dawn a ni," a ti bawk.

Khuallian, CM Zoramthanga chuan, "Remna thuthlung ziah zan tluka mipui an hlim leh an lâwm kha Mizoramah sawi tur a la awm lo," a ti a; hun kal zelah erawh chhan hrang hrang vangin Remna Ni pawimawhna mite thinlungah a reh tial tial thu a sawi.

Zoramthanga chuan, remna nei tura kalkawng biboh tak leh harsa takte leh thil thleng tam takte chu engmah loah chhuah theih a nih laiin, ṭhangthar zelte'n Mizo hnam chanchin leh hun kal tawh an hriatthiam theihna tura thahnemngai taka ruahmanna MZP-in an siam chu ropui a tih thu a sawi a; ram him nan hnam thinlung put a pawimawh thu a sawi bawk.

MZP-in Remna Ni lawmna an buatsaihah hian Greenland HSS, Mount Carmel HSS, St. Anthony's HSS leh St. Joseph HSS zirlaite'n hnam làm, lemchan leh zaite an entir a; rambuai laia remna zawnga kohhranin theihtawp chhuaha thâ a thawh avangin kohhran hmingin Mizoram Kohhran Hruaitute Committee (MKHC) hnenah chawimawina an hlàn a ni.