Ráltlânte tan vehbûr khawn dawn; sorkar laipuiin ṭanpuina a la pe lo

Manipur aṭanga sahimna zawnga Mizorama rawn lutte chungchang ngaihtuah tura Mizoram sorkarin a din 'Executive Committee on Internally Displaced Persons of Manipur in Mizoram' chuan vawiin aṭangin vehbûr a khawn ṭan dawn. Hetih lai hian, Manipur raltlante tan sorkar laipui aṭangin ṭanpuina hmuh a la ni lo.

Executive Committee on Internally Displaced Persons of Manipur in Mizoram chuan vehbûr hi minister, MLA leh sorkar official-te hnenah an khawn dawn a ni.

Manipur aṭanga ráltlânte tan hian chief minister Zoramthanga chuan sorkar laipuiah ṭanpuina cheng vbc. 10 a dil a, dilna hi May 23, 2023 khan a thawn. Chief Minister-in ṭanpuina a dil chungchangah hian sorkar laipuiin thu leh hla a la nei lo.

Manipur-ah May 3, 2023-a buaina a chhuah hnu, May 5 aṭangin Zo hnahthlak eng emaw zat chu sahimna zawngin Mizoramah an rawn lut a, tunah hian mi 10,000 chuang an awm mek.

Manipur buaina vanga in leh lo chán emaw, mahni in luah ngam loa state danga ráltlânte hi sorkar laipui chuan chhawmdawlna atan anmahni lo mikhualtu state sorkar hnenah ṭanpuina sum a pe ṭhin a, Manipur aṭanga Mizorama ráltlân lo lutte tan erawh tun thlengin a la pe lo a ni.