'Project Zoram Chhanchhuah' hun ZPM Ṭhalai-in Mamitah an hmang

ZPM Ṭhalai chuan July 1, Inrinni khan Mamita Siamliana Hall-ah 'Project Zoram Chhanchhuah' hun an hmang a, kum 2023 Mizoram Legislative Assembly inthlanpuia ZPM candidate tura puan tawhte leh bial vil tura ruatte'n hmanpuiin thu an sawi.

Inkhawmah hian ZPM Ṭhalai president Dr C Lalrammawia chuan, ZPM chu beidawng kal khawm an ni lo tih sawiin, "Sorkar thar beiseitute kan ni. Party dangte hian eng ang pawhin min bei se, chî-âi tur kan ni lo a, chak taka hma lam pan zel tur kan ni a, min beih hian min bei kâng zel a ni," a ti.

Mamit bial vil tura ruat H Zorempuia chuan, MNF sorkar leh Congress sorkarin Brig. T Sailo policy - Six Basic Needs an hlamchhiah nia sawiin, "Bungrua ang maia min ngai a, min lilám a, an tlin hnua min hre zui tawh lo turte hi kan mamawh tawh lo," a ti a; mipuiin hmasawnna kawng zawhpuitu tur an duh tawh thu a sawi.

Dampa bial viltu Vanlalsailova chuan ZPM chu tling tura duh mai ni loin, mipuiin tling tura an rin rawn a ni mek niin a sawi a, "Ruling party-in 'Aw tuna kan ram dinhmun hi dáwn ve la lung a awi nêm maw,' an tih chu 'Awi e' tia thlâk turin ZPM chuan hma a la mêk," a ti a; politics a luhchilh chhan sawiin, "Ei ru lo tura pulpit tlang aṭanga ka thu sawiin zawm a hlawh tâwk loh avangin, ei ru hrem thei khawvela luhchilh law law ka duh a ni," a ti.

Hachhek bial viltu KJ Lalbiakngheta chuan, "Kan mamawhna leh kan panna laiah kan chhia leh ṭha hriatna hmang thei loin kan elpui party-te'n min nawr beh an tum a, chu'ng chu Pathianin chhia leh ṭha hriatna sang tak min pek hmangin i khéng bet ang u. ZPM chuan a lèra ṭhuai loin, a bul aṭang rêtin hmasawnna hna a thawk dawn a ni," a ti a; ZPM-ah Mamit district tan káwl a êng dawn niin a sawi.

Aizawl West-II viltu Lalnghinglova Hmar pawhin thu sawiin, ram vei turin Mamit district mipui a sáwm a, "ZPM hi sorkar pawh ni se an ṭha bik chuang lo ang titute thusawi hi thlen dik lohtir kan tum. Ram leh hnam hmasawnna tura sum lo kalte dik taka hmang turin kan rawn ding chhuak a ni," a ti.

South Tuipui biala ZPM-in an candidate ni tura an puan tawh Jeje Lalpekhlua chuan, "Eirukna do ngam leh hma min sawn pui thei tura tum ram min thlenpui ngei tuma ke pên mek leh a ngaihna hria CM candidate kan nei a ni," a ti a, nghet taka ding turin Mamit district mipui a chah.

AMC Ward-VIII corporator Christina Roluahpuii Sailo pawhin, "Sorkar nawmzia tem ve tur ni loin, mipuiin sorkar ṭha neih hlutzia an hriat theih nan theihtawp kan chhuah a ni," a ti bawk.