Deputy Chief Minister enkawl department-te'n hma an sawn nasa hle - MNF Media & Publicity

MNF Media & Publicity department hotute chuan July 1, Inrinni khan Aizawl Press Club-ah thuthar thehdarhtute an kâwm a; deputy chief minister Tawnluia enkawl department-te'n hma an sawn nasa hle niin an sawi.

MNF Media general secretary VL Krosshnehzova chuan, Tawnluia chu 'Pathian nen lo chuan ka kal ngam tawh lo' titu a nih thu sawiin, "Kum upa lam a nih tawh hnua natna khirh takin a tlakbuak a, chumi aṭanga Pathian tihdamna ropui tak changtu deputy CM leh MNF senior vice president Pu Tawnluia hi MNF chuan thinlung takin kan chhuang," a ti.

VL Krosshnehzova chuan, Mizoramah eng pawh thleng se ram leh hnam tan a him em, Kristian tan a him em, tih chu Deputy CM ngaihtuah hmasak ṭhin a nia sawiin, "Sorkar mai ni loin MNF party tan pawh hian a pawimawh em em a, nationalism khai dingtu ban pawimawh a ni," a ti a; Tawnluia chu MNF army chief hlui a nih angin Ex-MNA-te’n pa ena an en a nih thu a sawi.

MNF General Secretary chuan, Tawnluia'n technical thil thleng a hre bel hle nia sawiin, "Ani hona hnuaiah hian Public Health Engineering, Urban Development & Poverty Alleviation leh Personnel & Administrative Reforms department-te'n hma an sawn nasa em em a, Zoram tan hna ropui tak tak leh chhinchhiah tlak tak tak ṭhahnem tak an thawk a ni," a ti.

MNF Media hotute tarlan danin, July 26, 2021 khan Assam police-te Mizoram ramri kânin an rawn lut a, Mizoram police duty post an luh chhuah a ni. Chumi ṭuma Dy CM Tawnluia thu rolum chu, 'Kan duty post hi tlai dar 5 hmain engti zawng pawhin kan la lêt leh tur a ni' tih a ni. Chief minister Zoramthanga nen sawi dunin thutlukna lian tak an siam a, silai a puak ta a; Mizoram police duty post an la lêt mai ni loin, Mizoramin ramri-ah nasa takin hma a sawn phah a ni.