Covid-19: Mizoram dinhmun Hripui vei 28 hmuh belh a ni

September 29, Thawhlehni khan Mizoramah mi 1,515-te swab sample endik aṭangin Covid-19 vei mi 28 (mipa 27 leh hmeichhia pakhat) hmuh chhuah a ni a, nimin khan mi 22 chhuahtir an ni thung.

Covid-19 vei September 29-a hmuh chhuah mi 28 zinga mi 13 chu ZMC laboratory-a hmuh a ni a, Champhai leh Serchhipa District Hospital laboratory-ah mi pakhat ve ve leh, Rapid Antigen Test (RAT) hmangin Aizawlah mi pakhat, Lungleiah mi pahnih leh Serchhipah mi 10 hmuh thar a ni bawk.

Nimin khan hmun hrang hrang aṭangin Covid-19 vei dam tawh mi 22 chhuahtir an ni a; State Referral Hospital aṭangin pakhat, CCC hrang hrang - Lunglei Pukpui aṭangin pathum, Lunglei Sazaikawn aṭangin pali, Chhiahtlangah pali, Lawngtlaiah pathum, Champhai leh Mamitah pakhat ve ve leh, home isolation-a awm pangate an ni. September 29-a chhuak zingah nimina Vanglainia tarlan hman loh mi pathum an awm a, Darlawn CCC-a enkawlte an ni.

Mizorama Covid-19 vei hmuh tawh mi 1,986-te chu mipa 1,628 leh hmeichhia 358 an ni a; an zinga mi 1,598 (80.46%) an chhuak tawh a, enkawl mek mi 388 (19.54%) an awm. La chhuak lo zingah hripui an vei tawh lo (negative tawh) eng emaw zat an awm bawk.

Covid-19 Medical Operational Team chairman Dr ZR Thiamsanga, MLA chuan nimin khan Champhai District Hospital-ah TrueNAT laboratory bun thar a hawng.

Dr ZR Thiamsanga chuan, sorkarin Covid-19 inkaihhruaina a thlahdul mek zel karah hri laka state himna turin puipunnate khap chhunzawm a nih thu a sawi a, "Mizoramah Covid-19 vanga thi an la awm lo hi Pathian vènna leh kan zavaia ṭanhona vang a ni. Ram hruaitute'n thliar bik awm loin ṭan an la a, rál hmatawnga thawk - sorkar hnathawk, tlawmngai pawl leh media-te ṭang tlangin tun hun hi kan thlen theih phah a ni," a ti.

Ni tin eizawnna leh khawsak phungte tibahlah loa Covid-19 nena chênho thiam a ngaih thu sawiin ZR Thiamsanga chuan, "Sorkarin inkaihhruaina a siamte erawh ṭha taka zawm a ngai. Chief Minister leh Health Minister-te hmalakna hmanga district tina TrueNat laboratory bunah ni khatah sample 40-50 test theih tura beisei a ni a, natna dang 20 chuang test theih a ni," a ti a; ICMR-in test tur criteria-in a huamteah test man lak a nih loh thu a sawi.

Champhai DC Maria CT Zuali pawhin thu sawiin, "TrueNat laboratory hi duh anga hmaa hawn ni thei lo mah se, a ṭul anga hman a ni. Covid-19 dona kawnga rál hmatáwnga ding, hmanrua nei ṭha lo chung pawha thawktute an fakawm hle a ni," a ti.

Champhaia TrueNat laboratory-ah hian September 14 aṭangin Covid-19 sample endik ṭan a ni a, sample 88 endik tawh niin, hripui vei mi pathum hmuh chhuah a ni tawh.