AAP-in UCC hman dawn chuan A nghawng turte ràwn vek an duh

Aam Aadmi Party (AAP), Mizoram hotute chuan, sorkar laipuiin Uniform Civil Code (UCC) kalpui a tum chu Mizoram mipui tan a hlauhawm lo niin an sawi a; chutih rualin, UCC siamnaah a nghawng turte ràwn vek an duh thu an sawi thung.

AAP hruaitute hian July 1, Inrinni khan Aizawl Press Club-ah thuthar thehdarhtute an kâwm a; sorkar laipuiin UCC kaltlangpui a tum a nih chuan an thlàwp thu an sawi rualin, "A dan siamnaah a nghawng turte ràwn vek kan duh. India ram sakhua leh hnam hrang hrang awm khawmnaah hman mai a har hle dawn," an ti.

AAP Mizoram hruaitute sawi danin, UCC chuan inneihna, inṭhenna leh chhungkaw inrêlbàwlna hrang hranga India ram pumpui dan khat hnuaia luan khawmna a kâwk a; UCC kalpui a nih chuan hnam leh sakhaw tih dante awm tawh loin, dan khat hnuaiah inneihna leh inṭhenna kalpui a ni dawn.

UCC hman a nih chuan Mizo inneih dante leh inṭhenna leh ro chhawm chungchangah te, sakhua leh hnam bil tih dan awm tawh loin, UCC dan hnuaiah dan angin a kal tawh dawn tihna a ni.

BJP chuan UCC chu kum 2014 khan India Danpui Part IV-a Article 44 tlawhchhanin kalpui an lo tum tawh a; UCC chu kalpui tur ti mah se, Concurrent List hnuaiah inneih, inṭhen leh chhungkaw inrêlbàwlna lam a awm avangin tihhlawhtlin theih a ni lo.

Article 371 hnuaiah state hrang hrang zingah Mizoram leh Nagaland-te tiamin sakhua leh hnam bilin an lo kalpui tawh ṭhin dante chu hum tlat a ni a; tihdanglam a nih dawn chuan ràwn an nih a, an aiawha roreltute'n an pawm a ngai. Mizoram state aiawha roreltute'n UCC chu an pawm dawn loh avangin UCC chu India ramah kalpui a ni ngai dawn chuang loah AAP chuan an ngai bawk.