KHAWTHLIR

Thisen pe

July 1, Inrinni khan pawl hrang hrangin thisen unit 173 an pe. SAY, Southern Division Lunglei ten Civil Hospital tan unit 63 an pe a, petute mipa 58 leh hmeichhia panga an ni a; SAY Central South Division, Serchhip-in Serchhip District Hospital tan unit 30 pein, petute mipa 26 leh hmeichhia pali an ni a; SAY, Siaha ten District Hospital tan unit 16 pein, petute mipa 14 leh hmeichhia pahnih an ni. KṬP, Jubili Branch-in Synod Hospital tan unit 24 an pe a, petute mipa 19 leh hmeichhia panga an ni a; KṬP, Khuangleng Bial member mipa 35 leh hmeichhia pangate'n Champhai District Hospital tan unit 40 an pe bawk.

Kuhva leh heroin

Assam Rifles sipaite chuan June 30, 2023 khan Melbuk, Champhai district-ah dan loa Myanmar aṭanga lak luh kuhva rah ip 150 an man a, Champhai Zote leh Ṭiau lui inkarah heroin gram 33 an man bawk.

Raltlan tanpui

Cathedral Parish Pastoral Council office bearer leh catechist-te chuan July 1, Inrinni khan Manipur aṭanga sahimna zawnga Mizorama rawn lutte hnenah ṭanpuina an hlan. Hlimen YMA relief camp-ah Rs 40,000, YMA Mission Veng relief camp-ah Rs 20,000, Mission Vengthlang YMA relief camp-ah Rs 20,000 leh Tuikhuahtlang YMA relief camp-ah Rs 20,000 an pe a ni.

June 2023 Covid-19 dinhmun

June 2023 chhung khan Mizoramah Covid-19 vei nia rinhlelh mi 767 swab sample endik a ni a, Covid positive mi 116 (15.12%) hmuh chhuah a ni. June thla chhungin Covid-19 vanga thi an awm lo a, positive zinga mi 146 chu dam takin an chhuak. Mizoramah July 1, Inrinni thleng khan swab sample 19,96,586 endik aṭangin hripui vei mi 2,39,545 hmuh a ni tawh a, mi 733-in thihpuiin, positive mek mi pasarih an awm.

Biak-in hawng

Salvation Army, Zemabawk Corps biak-in thar chu nimin khan territorial commander Col. Lalhmingliana'n a hawng. Biak-in Nivember 2018-a sak ṭan, June 2023-a sak zawh a ni a, a sakna atan cheng nuai 450 an seng a ni.