October thla chhunga inkaih-hruaina tur sorkarin tichhuak

Mizoram sorkar chuan October thla chhunga Mizoram mipuite inkaihhruaina tur a tichhuak a, state leh international border-te hawn a ni tawh dawn a; district headquarters-ah zan dar 8:00 aṭanga zing dar 4:30 inkarah pawn chhuah phal a ni lo.

State Disaster Management Authority hnuaia State Exe-cutive Committee chairman, chief secretary ni bawk Lalnunmawia Chuaungo chuan nimin khan inkaihhruaina hi a tichhuak a, Mizoram luh chhuahna Bairabi, Kanhmun, Khawkawn, Vairengte leh Zokhawthar kal tlanga kawngpuite chu bungrua leh khualzin phur lirtheite tan hawn a ni ang a, Lengpui Airport hawn chhunzawm a ni ang.

District headquarters tinah zan dar 8:00 leh zing dar 4:30 inkarah phalna nei lo tan pawn chhuah khap a ni a, Aizawl khawpuiah chuan Pathianniah lirthei tlan phal a ni lo ang. Aizawla lirthei intlan chhawk dan chu a pangngaia kalpui zel tur a ni a, October 12 aṭangin intlan chhawk hun hi zing dar 9:00 leh tlai dar 4:30 chhung a ni ang.

Mizoram sorkar hnuaia office-te chu dan pangngaia kal chhunzawm tur a ni a, anmahni leh a dawrtute himna tura inkaihhruainate zawm tura tih an ni a; minister-te public interview neih ṭhin chu tihtawp zel a la ni.

Containment area pawnah chuan pawl 9-12 zirlaite chu anmahni duhthlannain sikul kai phalsak an ni a, sikula inkaihhruaina tur a hranpaa duan chu zawm vek tur a ni thung a; Industrial Training Institutes, NSDC leh sorkar laipui hnuaia skill training-na hrang hrangte kalpui phalsak an ni bawk.

Pathian biak inkhawm neih phal a la ni lo a, hetihlai hian mi 50 tling lo tan zing ṭawngṭai inkhawm leh committee/rorel inkhawm neih phal a ni a, hengahte hian zai phal a la ni lo. 

Mitthi vuinaah mi 50 aia tam punkhawm phal a ni lo a, mitthi vuinaa kalte hi an nihna chhinchhiah vek tur a ni a, thingpui sem phal a nih loh bakah mitthi inah hian hun hmangtute pawhin mask an vuah reng tur a ni.

Dawr hawn phal a ni a, zan dar 7:00-ah khar tur a ni thung a; dawrah hand sanitizer chhawp tur a ni a, dawra kalte chhinchhiah tur a nih bakah fel takin social distancing an zawm tur a ni.