Health Care Scheme inzirtir

Kolasib khawpui huam chhunga khawtlang hruaitute pualin Mizoram Health Care Scheme leh AB-PMJAY golden card chungchang zirtirna hun hman mek a ni a, nimin khan DMS conference hall-ah Kolasib khawpuia YMA branch hruaitute tan buatsaih leh a ni.

Coordinator Chawng­lian­mawia chuan, Mizo­ram Health Care Scheme leh sorkar laipuiin health care scheme a duan AB-PMJAY golden card chungchanga YMA hruai­tute zirtir tura koh an nih chhan a sawi a, "YMA-te hi MHCS atan kan kut leh kê in ni a, ASHA leh health worker-te thâ tichak theitu tur in nih avangin health care scheme pahnihte hi in hriat chian a ngai a ni," a ti.

Chawnglianmawia sawi danin, MHCS leh AB-PMJAY golden card hmang hian October 1, 2020 aṭanga September 30, 2021 thlengin damdawi-ina inenkawlna senso hmuh let theih a ni dawn. MSHCS-a inziah luh man chu BPL tan Rs. 100 leh BPL ni lo, APL card nei tan Rs. 1,000 a ni.